Fransanın "Kyutai" süni intellekt laboratoriyasından ayrılaraq müstəqil fəaliyyətə başlayan Gradium startapı 70 milyon dollar dəyərində toxum (seed) investisiyası əldə edib. İnvestisiya raunduna FirstMark Capital və Eurazeo şirkətləri rəhbərlik edib. İştirakçılar arasında fransız telekommunikasiya maqnatı Xavier Niel, Google-un keçmiş rəhbəri Erik Şmidt və DST Global Partners kimi nüfuzlu investorlar yer alıb.
Cəmi bir neçə ay əvvəl – 2025-ci ilin sentyabrında keçmiş Google DeepMind tədqiqatçısı Neil Zeghidour tərəfindən təsis edilən Gradium, bazara iddialı texnologiya ilə daxil olur. Şirkətin hazırladığı audio modellər ultra-aşağı gecikmə sürəti (ultra-low latency) ilə işləyir. Bu texnologiya süni intellektin insan səsinə demək olar ki, anında reaksiya verməsini və cavablandırmasını təmin edir.
Avropa mənşəli startap fəaliyyətə başladığı ilk gündən etibarən ingilis, fransız, alman, ispan və portuqal dillərini dəstəkləyir. Əsas hədəf tərtibatçılar üçün daha sürətli və dəqiq səs modelləri təqdim etməkdir.
Hazırda OpenAI, Anthropic, Meta və ElevenLabs kimi nəhənglərin hökmranlıq etdiyi bazarda rəqabət olduqca güclüdür. Lakin Gradium komandası hesab edir ki, süni intellekt agentlərinin iş mühitindən əyləncə sektoruna qədər genişlənməsi fonunda, onların təklif etdiyi yüksək sürət və reallıq faktoruna tələbat getdikcə artacaq.
