Qazaxıstanın Almatı şəhərində doğulmuş və orta məktəbi yarımçıq qoymuş 18 yaşlı Arlan adlı gənc sahibkar dünyanın ən nüfuzlu startap akselerator proqramlarından biri olan Y Combinator (YC)-un 2025-ci ilin yay sessiyasına (S25) qəbul olunub. Bu, Qazaxıstandan olan gənc bir startapçının əzmkarlıq və texnoloji sahibkarlıq yolunda qazandığı böyük uğur kimi qiymətləndirilir.
Uşaqlıq arzusu gerçəyə çevrildi
Arlan ilk dəfə Y Combinator haqqında hələ ibtidai sinifdə oxuyarkən atasından eşidib. Onun sözlərinə görə, atasının dediyi bu sözlər yaddaşında iz buraxıb:
“Arlan, dünyada elə universitetlər var ki, orada insanlar sadəcə diplom almaq üçün oxuyurlar. Amma bir də Y Combinator kimi yerlər var – bu, qurucular üçün bir məktəbdir. Orada ideyanı təqdim edirsən, qəbul olsan, həm maliyyə, həm də güclü bir dəstək şəbəkəsi qazanırsan. Sənin də bir gün ora düşməyini istəyirəm.”
Erkən yaşlardan texnologiyaya maraq
Gənc yaşlarında Steve Jobs, Fairchild Semiconductor və Silikon Vadisinin tarixi haqqında oxumağa başlayan Arlan ilk startapını – Hanlan Tech-i 15 yaşında qurub. Platforma 20,000 istifadəçiyə qədər çatsa da, uzunmüddətli motivasiya tapmadığı üçün layihəni dayandırmaq qərarına gəlib.
“Hanlan Tech mənim üçün bir məktəb oldu. Dəyərləri orada öyrəndim,” – deyə Arlan bildirir. Atasının yerinə işi tamamladı
Bir neçə il əvvəl Arlanın atası da Y Combinator-a müraciət edib, lakin qəbul olunmayıb. Bu isə Arlan üçün bir motivasiyaya çevrilib:
“Bir şeyi başa düşdüm: bu işi mən tamamlamalıyam.”
İki dəfə uğursuz müraciətdən sonra Arlan geri çəkilməyib. Üçüncü cəhddə, S25 proqramına müraciət edərkən artıq məktəbdən çıxmış və Londona köçərək öz startapı – Nozomio üçün ilkin investisiya mərhələsini (pre-seed) LocalGlobe kimi tanınmış fondlardan toplamışdı.
Y Combinator-a qəbul zəngi: “Biz sizə yatırım etmək istəyirik”
Gərgin və intensiv keçən müsahibədən bir neçə saat sonra, gecə saat 00:16-da tanımadığı bir nömrədən zəng gəlib:
“Salam Arlan, Nozomio-nu yay sessiyası üçün maliyyələşdirmək istərdik.”
Arlan deyir ki, həmin gecə yuxuya gedə bilməyib.
Nozomio: Yeni startapın adı
Arlan hazırda əsas diqqətini Nozomio layihəsinə və onu qlobal səviyyəyə çıxarmağa yönəldib. Hələlik layihə ilə bağlı ətraflı məlumat açıqlanmasa da, Y Combinator-a daxil olmaq onun sahibkarlıq yolunda ciddi bir pillə hesab olunur.
“YC yalnız başlanğıcdır. Qarşıda saysız imkanlar var,” – deyə Arlan qeyd edir.
Bu uğur, gənclərə və xüsusilə də qeyri-ənənəvi yollarla təhsil alan şəxslərə, arzularının ardınca getməkdən çəkinməmək barədə ilhamverici bir nümunədir.
