ABŞ-nin Federal Ticarət Komissiyası (FTC) "Uber"ə qarşı məhkəmə iddiası qaldırıb. İddialara görə, Uber, istifadəçiləri "Uber One" adlı abunə xidməti ilə bağlı yanıltıb. Komissiya bildirir ki, Uber abunəliyi asanlıqla ləğv etməyə imkan verməyib və istifadəçilərin razılığı olmadan ödənişlər alıb.
FTC-nin sədri Endryu Fergüson bildirib ki, amerikalılar artıq abunəliklərini ləğv etməkdə çətinlik çəkməkdən yorulublar. Komissiyanın məlumatına görə, Uber abunəliyi ləğv etmə prosesini məqsədli şəkildə çətinləşdirib. Bəzi istifadəçilərə müştəri dəstəyi ilə əlaqə saxlamaq tövsiyə edilib, lakin bu əlaqə üçün effektiv bir yol təqdim olunmayıb. Həmçinin, bəzi hallarda abunəlik rəsmi olaraq ləğv edildikdən sonra da Uber, istifadəçilərdən ödəniş almağa davam edib.
Uber-in sözçüsü isə ittihamları təkzib edib və məhkəmədə öz mövqelərini müdafiə edəcəklərini bildirib. Onlar vurğulayıblar ki, istifadəçilərin razılığı olmadan ödəniş alınmır və abunəlik, tətbiq vasitəsilə 20 saniyə ərzində ləğv oluna bilər.
Uber One xidməti 2021-ci ildən fəaliyyət göstərir. Aylıq abunə haqqı 9.99 dollar, illik abunə haqqı isə 96 dollar təşkil edir. Bu xidmətlə istifadəçilər Uber Eats xidmətində pulsuz çatdırılma və sifarişlərdə endirimlər əldə edirlər.
FTC artıq 2024-cü ilin payızında bəyan etmişdi ki, bir çox şirkət abunəliyin ləğvini süni şəkildə çətinləşdirir və bu, istifadəçilər üçün böyük çətinliklər yaradır. Komissiya, abunəliyin asan və "bir kliklə" ləğv olunmasını təmin edəcək yeni qaydaların tətbiq ediləcəyini vurğulayıb. Lakin bəzi sənaye assosiasiyaları bu təşəbbüsə qarşı məhkəmə iddiaları qaldırıblar.
