Amazon şirkəti süni intellekt və bulud texnologiyalarını gücləndirmək məqsədilə ABŞ-nin Pennsylvania ştatında iki yeni məlumat mərkəzinin inşası üçün 20 milyard dollar dəyərində investisiya ayıracağını açıqlayıb. Bu təşəbbüs həm texnoloji inkişaf, həm də regional iqtisadi dirçəliş baxımından böyük əhəmiyyət daşıyır.
Yeni data mərkəzlərindən biri Susquehanna Atom Elektrik Stansiyasının yaxınlığında inşa ediləcək və enerji təchizatında sabitlik təmin etmək məqsədilə məhz bu obyektin seçildiyi bildirilir. Digər mərkəz isə əvvəllər metallurgiya zavodu kimi fəaliyyət göstərmiş və hazırda ticarət mərkəzi kimi istifadə olunan Keystone Trade Center-in ərazisində qurulacaq.
Amazon-un bu addımı nəticəsində yalnız tikinti mərhələsi istisna olmaqla, uzunmüddətli dövrdə azı 1.250 yüksək ixtisaslı daimi iş yerinin yaradılacağı gözlənilir. Eyni zamanda, STEM (elm, texnologiya, mühəndislik və riyaziyyat) sahəsində təhsil proqramlarının dəstəklənməsi də nəzərdə tutulur. Pennsylvania rəhbərliyi investisiyanı təşviq etmək məqsədilə 10 milyon dollar dəyərində işçi hazırlığı proqramı və data mərkəzi avadanlıqları üçün satış vergisindən azadolma təklif edib.
Layihə Amazon-un süni intellekt və bulud hesablama texnologiyaları üzrə qlobal liderlik mübarizəsində mühüm mərhələ olaraq qiymətləndirilir. Bu təşəbbüslə şirkət, AWS platformasını Microsoft və Google kimi rəqibləri qarşısında daha dayanıqlı və rəqabətqabiliyyətli hala gətirməyə çalışır. Eyni zamanda nüvə enerjisindən istifadə etməklə enerji təhlükəsizliyi və davamlılığına yönəlmiş yanaşma da bu strategiyanın ayrılmaz hissəsidir.
Pennsylvania ştatının qubernatoru Coş Şapiro bu investisiyanı ölkə miqyasında strateji əhəmiyyətli addım kimi qiymətləndirib. Onun sözlərinə görə, süni intellekt sahəsində hazırda ABŞ və Çin arasında ciddi bir üstünlük mübarizəsi gedir və Amazon-un təşəbbüsü bu yarışda ABŞ-nin mövqeyini gücləndirəcək: “Amazon sayəsində bu mübarizənin gələcəyi Pennsylvania-dan keçəcək.”
Amazon-un bu layihəsi, şirkətin ABŞ daxilində həyata keçirdiyi ən iri texnoloji investisiyalardan biri olmaqla yanaşı, süni intellekt sahəsində ölkənin innovasiya liderliyini təmin etmə niyyətini də əks etdirir.
