Amazon, Çinlə artan geosiyasi gərginliklər fonunda Şanxaydakı Süni İntellekt (AI) tədqiqat laboratoriyasını bağlamaq qərarına gəlib. Bu addım, IBM və Microsoft kimi digər ABŞ şirkətlərinin də Çindəki tədqiqat fəaliyyətlərini məhdudlaşdırdıqları bir dövrdə baş verir.
Amazon-un bu laboratoriyası 2018-ci ildə şirkətin Amazon Web Services (AWS) bölməsi tərəfindən yaradılmışdı. Laboratoriyanın baş elmi işçisi Vanq Mincie sosial mediada paylaşdığı yazıda komandasının “ABŞ-Çin münasibətlərindəki gərginlik səbəbilə strateji dəyişikliklərə görə ləğv edildiyini” bildirib. Onun sözlərinə görə, komanda son altı ildə 100-dən çox elmi məqalə dərc edib və Amazon-un təxminən 1 milyard dollar gəlir əldə etməsinə səbəb olan açıq mənbəli neyron şəbəkə alqoritmləri üzərində çalışıb.
Amazon-un sözçüsü isə bildirib ki, AWS daxilində müəyyən komandalar üzrə iş yerləri ixtisar edilir. Bu, şirkətin beynəlxalq miqyasda ixtisarlara başladığı bir mərhələyə təsadüf edir. Amazon rəhbəri Endi Cassi də ötən ay bildirmişdi ki, süni intellektin inkişafı bütün şirkət üzrə bəzi işlərin avtomatlaşdırılmasına və nəticədə bəzi işçilərin ixtisarına səbəb olacaq.
Amazon hal-hazırda Çində əsasən ölkədə fəaliyyət göstərən beynəlxalq şirkətlərə və qlobal əməliyyatlar üçün AWS-dən istifadə edən yerli texnologiya firmalarına xidmət göstərir. Lakin ABŞ hökumətinin Çinə qabaqcıl çip və bulud xidmətlərinə çıxışı məhdudlaşdıran siyasəti, Çinli tədqiqatçıların beynəlxalq əməkdaşlıq imkanlarını da çətinləşdirir.
Amazon daha əvvəl də Çindəki fəaliyyətlərini azaldıb – 2019-cu ildə elektron ticarət sahəsindən çıxıb və 2023-cü ildə elektron kitab mağazasını bağlayıb.
