Anthropic, Claude çat-botuna istifadəçiləri addım-addım öyrədən yeni “Learning” funksiyası gətirib. Bu rejimdə bot cavabı birbaşa təqdim etmir, mövzunu izah edir, suallar verir və istifadəçiyə özünün nəticəyə gəlməsini təklif edir.
Əvvəllər yalnız Claude for Education veb-versiyasında mövcud olan funksiya indi iOS və Android tətbiqlərində də pulsuz istifadə oluna bilir.
Yenilik proqramçılar üçün də nəzərdə tutulub. Claude Code redaktorunda “Learning” rejimi kodu tam yazmadan dayanır və istifadəçiyə qalan hissəni tamamlamasını təklif edir. “Explanatory” rejimində isə kod sətirlərini addım-addım izah edir. Anthropic bunu “sanki təcrübəli mentorla birlikdə proqramlaşdırmaq” kimi təqdim edir.
İstifadəçilər /output-style komandasından istədikləri üslubu seçə bilərlər. Əsas “Default” rejimi isə qalır.
Claude tətbiqi pulsuz yüklənə bilir və söhbət, kod yazmaq, şəkil və sənəd analizi üçün istifadə olunur. Claude Code isə yalnız ödənişli planlarda mövcuddur: Pro – 20 dollar, Max – 100 və ya 200 dollar (istifadə limitinə görə dəyişir).
Anthropic-in bu yeniliyi, xüsusən də interaktiv şəkildə öyrənmək istəyənlər üçün yeni imkanlar yaradır.
