Anthropic, proqram təminatı inkişafı sahəsindəki performansı ilə rəqibləri OpenAI və Google-dan üstün sayılan yeni modeli Claude Sonnet 4.5-i bütün istifadəçilərin istifadəsinə verib. Şirkət bu aləti "dünyanın ən yaxşı kod yazma modeli" kimi təqdim edir.
Anthropic, Claude Sonnet 4.5-in proqram tərtibatı (kod yazmaq), mürəkkəb Sİ agentləri yaratmaq və kompüterdən istifadə qabiliyyətləri baxımından yüksək səviyyəli performans vəd etdiyini bildirir.
Modelin əhəmiyyəti ondadır ki, o, şirkətin əvvəlki modelləri olan Opus 4.1 və Sonnet 4-dən sonra təqdim olunur. Məhsul komandasının sözlərinə görə, yeni Sonnet 4.5, Opus 4.1-dən daha aşağı maya dəyərinə sahib olsa da, hər parametr üzrə daha ağıllıdır.
Sİ nəhəngi vurğulayır ki, Claude Sonnet 4.5, sənaye standartı olan proqram təminatı testlərində liderliyi ələ keçirib. Həmçinin model, 30 saata qədər kəsilmədən və ardıcıl olaraq çoxmərhələli tapşırıqlara fokuslanmaqla avtonom (müstəqil) işləmə imkanı təmin edir.
Bu yeni model kibertəhlükəsizlik, maliyyə və tədqiqat kimi xüsusi sahələrdəki üstün fəaliyyəti ilə diqqət çəkir. Claude Sonnet 4.5 avtomatik olaraq Claude platformasına əsas (ilkin) model kimi birləşdiriləcək. Ödənişli abunəçilər isə istəklərinə uyğun olaraq Opus və ya əvvəlki Sonnet versiyalarına keçid edə bilərlər.
Anthropic şirkəti gələcək hədəflərindən danışarkən, 2025-ci ilin sonuna qədər, yeni bir Opus modeli də daxil olmaqla, daha bir və ya iki əlavə versiyanın buraxılmasının "çox ehtimal olunduğunu" bildirib.
