Azərbaycanın aparıcı idman aqreqatoru “Push30” Özbəkistan bazarına da daxil olub.
Bu startap cari ilin 1 may tarixindən Özbəkistanın paytaxtı Daşkənd şəhərində də fəaliyyətə başlayıb.
2019-cu ildə təsis edilmiş “Push30” pandemiya səbəbindən yalnız 2021-ci ildən aktiv fəaliyyətə başlayıb. Bu illər ərzində “Push30” özünü Azərbaycanda idman sahəsinin əsas oyunçusu kimi təsdiqləyib. Şirkətin şəbəkəsinə 200-dən çox idman mərkəzi və 18 000 istifadəçi daxildir. “Push30”, həmçinin yerli və dünyaca məşhur brendlər də daxil olmaqla 2000-dən çox şirkətlə əməkdaşlıq müqaviləsi imzalayıb.
“Push30”, Avropa Yenidənqurma və İnkişaf Bankı tərəfindən 2022-ci ildə keçirilmiş “Star Venture” qrant proqramı çərçivəsində qalib seçilərək 50 000 Avro dəyərində mükafat və sertifikat ilə təltif olunub.
Şirkətin ekspansiyası üçün Özbəkistandakı tərəfdaşlar artıq 500 min Dollar məbləğində investisiya ayırıb. Daşkəndin 50 aparıcı idman mərkəzi ilə müqavilələr imzalanıb və yaxın gələcəkdə daha çox mərkəzlərlə əməkdaşlıq əlaqələrinin qurulması, eləcə də digər ölkələrə də fəaliyyətin genişləndirilməsi planlaşdırılır.
“Startapımızın Özbəkistanda fəaliyyətə başlamasından məmnunuq. Komandamız “Push30”un Azərbaycanda aparıcı idman aqreqatoruna çevrilməsi üçün çox çalışıb və xidmətlərimizi yeni bazara çıxarmağa hazırıq. İdman və sağlam həyat tərzini təbliğ etmək üçün Özbəkistandakı tərəfdaşlarımızla əməkdaşlıq etməyi səbirsizliklə gözləyirik”, - deyə “Push30”un Baş direktoru Adil Qasımov bildirib.
“Push30”un yaxın gələcək üçün planı Türkiyə, Gürcüstan, Qazaxstan, Yaxın Şərq və Hindistana ekspansiya edərək sağlam həyat tərzinin inkişafına dəstək verən böyük bir şəbəkəyə çevrilməkdir.
©marja.az
