“Turkic Game Jam” Türk Oyun Tərtibatçıları Assosiasiyası (“TuGDA”) çərçivəsində təşkil olunan və türk dünyasının bir neçə ölkəsində eyni vaxtda keçirilən beynəlxalq oyun hazırlama hakatonudur. Tədbir oyun tərtibatçılarını, rəssamları, proqramçıları və dizaynerləri bir araya gətirir; iştirakçılar komandalar şəklində türk mədəni irsindən qaynaqlanаn ümumi mövzu çərçivəsində 48 saat ərzində orijinal oyun prototipləri hazırlayırlar. “TGJ” 2025-ci ildə ilk dəfə keçirilmiş, 2026-cı ildə ikinci buraxılışını tamamlamışdır. İki buraxılış ərzində hakaton beş ölkədən altı ölkəyə genişlənmiş və qeydiyyatlı iştirakçı sayında 50%-dən çox artım qeydə alınmışdır.
“TGJ” iki mərhələdən ibarət formatda keçirilir. Yerli mərhələdə iki-dörd nəfərlik komandalar mövzunun rəsmi elanından etibarən 48 saat ərzində tam oyun prototipi hazırlayır. Sənaye mütəxəssislərindən ibarət yerli münsiflər heyəti işləri qiymətləndirir və irəliləyəcək komandaları müəyyənləşdirir. Böyük Finalda isə bütün iştirakçı ölkələrin finalist komandaları eyni ev sahibi şəhərdə toplaşaraq oyunlarını beynəlxalq münsiflər heyəti qarşısında təqdim edir. Ev sahibi şəhər hər il iştirakçı ölkələr arasında rotasiya edilir.
İlk buraxılış 2025-ci ilin 11-13 aprel tarixlərində Azərbaycan, Türkiyə, Qazaxıstan, Özbəkistan və Macarıstanda keçirilmiş, 130-dan çox qeydiyyatlı iştirakçı 50-dən artıq oyun təqdim etmişdir. Azərbaycanda yerli mərhələ “Gamepons” və “IGDA Azerbaijan” təşkilatçılığı ilə həyata keçirilmiş, 14 komanda və 60-dan çox iştirakçı "Türk Mifləri və Hekayələri" mövzusu üzərində yarışmışdır. İlk beşlikdə “PixelNodes”, “Virtue”, “Compot Games”, “No Studio” və “Trojan Horse Studios” komandaları yer almış; “Virtue” və “Trojan Horse Studios” isə 9 dekbarda baş tutan Böyük Finalda Azərbaycanı təmsil etmişdir. 2025-ci ilin Böyük Finalı Bakıda, Gamepons və IGDA Azerbaijan təşkilatçılığı, Yaradıcı Mərkəz və Azərbaycan Respublikası Mədəniyyət Nazirliyinin dəstəyi ilə keçirilmiş, bütün beş iştirakçı ölkənin finalist komandalarını bir araya gətirmişdir.
İkinci buraxılış 2026-cı ilin 5-7 iyun tarixlərində keçirilmiş, ilk dəfə qoşulan Şimali Kipr ilə ölkə sayı altıya çatmışdır. Bütün ölkələr üzrə 200-dən çox qeydiyyatlı iştirakçı 80-dən artıq oyun təqdim etmişdir. Bu göstəricilər 2025-ci illə müqayisədə qeydiyyatda 50%-dən çox, təqdim edilmiş oyunlarda isə 60%-dən çox artımı əks etdirir. Azərbaycanda yerli mərhələ “Gamepons” və “IGDA Azerbaijan” təşkilatçılığı, Yaradıcı Mərkəzin dəstəyi ilə keçirilmiş, 20-dən çox komanda və 70-dən artıq iştirakçı toplanmışdır. 2026-cı ilin Böyük Finalı Macarıstanda keçiriləcək.
“TGJ” mövzuları türk mədəni irsindən götürülür və müxtəlif janrlara imkan verən açıq formatda oyun dizaynı brifinqləri kimi tərtib edilir. 2025-ci ildə tək mövzu olan "Türk Mifləri və Hekayələri" iştirakçıları türk dünyasının folkloru və şifahi ənənələrindən ilham almağa dəvət etmiş; bu da geniş janr spektrini əhatə edən narrativ, aksion və interaktiv əsərlərin ortaya çıxmasına zəmin yaratmışdır. 2026-cı ildə beş paralel mövzu elan edilmişdir: “Ceremony”, ritual icrasına və pozulmasına yönəlik mexanikalar üzərində qurulmuşdur; “Nomad”, hərəkət əsaslı mexanikalara diqqəti yönəltmişdir; “Knot”, xalçaçılıq ənənəsindən ilham alaraq tapmaca və bağlantı strukturlarını çərçivələmişdir; “Sky”, “Tengri” və türk kosmologiyasına istinad etmişdir; “Fire” isə ocağı simvol olaraq qəbul edərək sağ qalma və dözüm mexanikalarını əhatə etmişdir.
“TGJ 2026”-nın Azərbaycan mərhələsi tədbirə müxtəlif aspektlərdə töhfə verən institusional və sənaye tərəfdaşlarının dəstəyi ilə həyata keçirilmişdir. Yaradıcı Mərkəz yerli mərhələnin “venue” tərəfdaşı kimi çıxış etmiş, iştirakçıların 48 saatlıq hakatonda toplandığı fiziki məkanı Bakıda təmin etmişdir. Yerli mərhələnin başa çatmasının ardından qalib komandalar oyunları üzərində işləməyə davam edir, ən güclü finalistlər isə Azərbaycanı Böyük Finalda təmsil etmək üçün seçilir. “Xsolla” səyahət tərəfdaşı kimi dəstəyini təsdiqləmiş, Böyük Finala gedən Azərbaycanlı finalist komandaların səyahət və logistika xərclərini öz üzərinə götürmüşdür. Bu tərəfdaşlıq “Xsolla”nın inkişaf etməkdə olan bazarlarda oyun sənayesi infrastrukturunun inkişafına olan geniş öhdəliyini əks etdirir; platforma və ödəniş xidmətlərinin çərçivəsini aşaraq erkən mərhələdə ekosistem inkişafını şərtləndirən icmalara və tədbirlərə aktiv dəstəyi özündə ehtiva edir.
“TGJ 2026”nın Azərbaycan mərhələsinin idarəetməsi “Gamepons” tərəfindən hazırlanmış “HackathonHub” platforması vasitəsilə həyata keçirilmişdir. “HackathonHub” hakaton və “game jam” tədbirlərinin qeydiyyatdan sertifikat buraxılışına qədər tam dövrünü əhatə edən idarəetmə platformasıdır. Platforma qeydiyyat, komanda formalaşması, səsvermə, canlı idarəetmə və analitika proseslərini vahid sistem çərçivəsində birləşdirir.
“Turkic Game Jam” “TuGDA” tərəfindən təşkil olunur; Azərbaycan üzrə fəaliyyət “Gamepons” və “IGDA Azerbaijan” tərəfindən həyata keçirilir. İki buraxılış ərzində tədbir 130-dan çox iştirakçıdan 200-dən çoxa, 50-dən artıq oyundan 80-dən artığına yüksəlmişdir. 2025-ci ilin Böyük Finalı Yaradıcı Mərkəz və Azərbaycan Respublikası Mədəniyyət Nazirliyinin dəstəyi ilə Bakıda keçirilmişdir. 2026-cı ilin Böyük Finalı Budapeştdə keçiriləcək; Azərbaycanlı finalist komandalar Xsollanın səyahət və logistika dəstəyi ilə Macarıstana yollanacaq. Əlavə məlumat üçün turkicgamejam.com saytına müraciət etmək olar.
