Böyük Britaniyanın keçmiş baş naziri Rişi Sunak, Microsoft və Anthropic şirkətlərində baş müşavir vəzifəsinə təyin edilib. Bu yarımştat iş, Böyük Britaniyada nazirlikdən sonrakı fəaliyyətlərə nəzarət edən müstəqil təşkilat – Biznes Təyinatları üzrə Məşvərət Komitəsinin (ACOBA) ciddi qaydalarına uyğun olaraq formalaşdırılıb.
Sunak, "Anthropic" şirkətində qlobal strategiya, makroiqtisadiyyat və geosiyasi meyllər mövzusunda strateji məsləhətlər verəcək. Xüsusilə Sİ sahəsində qlobal istiqamətlərə diqqət yetirəcək. Lakin o, Böyük Britaniya hökumətinin siyasət məsələləri və ya müqavilələri ilə bağlı birbaşa məşğul olmayacaq.
Eyni şəkildə, "Microsoft"da da Baş Nazir olaraq qazandığı təcrübədən istifadə edərək strateji baxışlarını təqdim edəcək və şirkətin tədbirlərində əsas natiq kimi çıxışlar edəcək. O, bu vəzifədə də Britaniya hökuməti üçün lobbiçilik fəaliyyətlərində iştirak etməyəcək.
Ən diqqət çəkən məqam isə Rişi Sunakın bu vəzifələrdən əldə edəcəyi bütün gəliri xeyriyyə məqsədlərinə yönəltmək qərarıdır. O, bu vəsaiti özünün və həyat yoldaşı Akşata Murti tərəfindən təsis edilmiş, təhsil yönümlü layihələri dəstəkləyən "The Richmond Project" xeyriyyə fonduna bağışlayacağını açıqlayıb. Fondun əsas məqsədi Birləşmiş Krallıqda savadlılıq və hesablama bacarıqlarının inkişafına dəstək olmaqdır.
ACOBA təşkilatının tətbiq etdiyi məhdudiyyətlərə əsasən, Sunakın nazir səlahiyyətlərinin bitməsindən etibarən iki il müddətində hər iki şirkət adından Birləşmiş Krallıq hökuməti ilə lobbiçilik aparması qadağan edilib. Həmçinin, ona vəzifədə olarkən əldə etdiyi imtiyazlı məlumatlardan istifadə etməyə icazə verilmir. Bu şərtlər, maraq toqquşmasının qarşısını almaq və keçmiş nazirlərin yeni iş fəaliyyətlərində şəffaflığı təmin etmək məqsədi daşıyır.
Rişi Sunak bu təyinatla bağlı "Texnologiyanın dünyamızı dəyişdirəcəyinə və gələcəyimizdə əsas rol oynayacağına hər zaman inanmışam" deyə bildirib və bu inqilabi dəyişikliyin cəmiyyətə fayda verməsinə kömək etmək istədiyini vurğulayıb.
