Cisco real vaxt tərcümə texnologiyaları təqdim edən EzDubs startapını satın alıb. Sövdələşmənin dəyəri açıqlanmayıb. 2023-cü ildə Padmanabhan Krişnamurti, Amrutavarş Kinaqi və Kərim Nassar tərəfindən təsis olunan EzDubs, Y Combinator dəstəyi ilə inkişaf edib və Venture Highway-in rəhbərlik etdiyi raundda 4,2 milyon dollar investisiya cəlb etmişdi. Nassar əvvəllər Cisco-nun Speech AI komandasında çalışıb.
Cisco bildirib ki, EzDubs texnologiyası Cisco Collaboration platformasına inteqrasiya olunacaq və Webex kimi məhsullarda danışanın səsini və emosiyasını qoruyaraq real vaxt tərcümə funksiyasını təqdim edəcək. Texnologiya həmçinin tərəfdaşlar və tərtibatçılar üçün açıq ola bilər. Cisco Collaboration-un vitse-prezidenti Snorre Kjesbu EzDubs komandası ilə birlikdə əməkdaşlıq texnologiyalarında yeni mərhələ yaratmağı planlaşdırdıqlarını bildirib.
EzDubs isə istehlakçı yönümlü tətbiqlərini 15 dekabrda dayandıracaq. Startap blog yazısında video dublyaj aləti və real vaxt tərcümə texnologiyasının uğurlarını qeyd edərək istifadəçilərə təşəkkür edib.
Son aylarda tərcümə texnologiyaları sahəsində bir neçə satınalma reallaşıb: iyulda TransPerfect Unbabel-i, bu ay isə Palabra AI Talo platformasını alıb. Ekspertlər bildirirlər ki, tərcümə xidmətlərində əsas tələbat korporativ kommunikasiya bazarında formalaşır və bu sahədə bazarın dəyəri təxminən 40 milyard dollar təşkil edir.
