Google süni intellekt sahəsində yeni inkişafları elan edərək, Gemini 2.5 model ailəsinə daxil olan ən sürətli və əlçatan model — Gemini 2.5 Flash-Lite-nın önizləmə versiyasını təqdim edib. Eyni zamanda, şirkət Gemini 2.5 Pro və Gemini 2.5 Flash modellərinin “stabil” versiyalarını da istifadəyə verib.
Gemini 2.5 Flash-Lite modeli əvvəlki versiya — 2.0 Flash-Lite ilə müqayisədə riyaziyyat, proqramlaşdırma, məntiq və digər tapşırıqlarda daha yüksək nəticələr göstərir. Model gecikməyə həssas olan tapşırıqlarda, o cümlədən tərcümə və təsnifat işlərində də yüksək performans nümayiş etdirir.
Yeni model önizləmə versiyası hal-hazırda Google AI Studio və Vertex AI platformalarında əlçatandır. Həmçinin, Gemini 2.5 Pro və hibrid “məntiq” xüsusiyyətli Gemini 2.5 Flash modellərinin stabil versiyaları da eyni platformalarda və Gemini tətbiqində mövcuddur.
Qiymət siyasətinə görə, Gemini 2.5 Flash-Lite 1 milyon daxil olan “token” (mətn, şəkil və ya video) üçün 0,10 dollar, səs üçün isə 0,50 dollar, çıxan “token” üçün isə 0,40 dollar təşkil edir. Digər Google modellərindən fərqli olaraq, yeni “məntiq” funksiyası standart olaraq deaktiv vəziyyətdədir.
Google-un təqdim etdiyi rəsmi benchmark nəticələrinə əsasən, Gemini 2.5 ailəsi sürət, performans və sərfəlilik baxımından müxtəlif tapşırıqlar üçün optimal seçimlər təklif edir.
