Biznes əlaqələri, işçi və iş tapmaq sahəsində dünyanın ən məşhur platformalarından biri olan LinkedIn Çindəki InCareer tətbiqini bağlayaraq 716 nəfəri işdən çıxaracağını açıqlayıb.
Şirkətin baş direktoru Rayan Roslanski işçilərinə yazdığı elektron məktubda işdən çıxarılmalarına səbəb kimi dünyadakı güclü rəqabət və çətin makroiqtisadi mühiti göstərib. O, qeyri-müəyyən iqtisadi şərtlər qarşısında şirkəti daha çevik hala gətirmək istədiklərini qeyd edib.
LinkedIn-in Ceo-sunun sözlərinə görə, məhsul və mühəndislik qrupları şirkətin texnoloji yol xəritəsinə cavabdeh olacaq, biznes məhsuldarlığı komandası isə mərhələli şəkildə ləğv edilərək biznesin digər hissələrinə qismən inteqrasiya olunacaq. Tədricən baş tutacaq ixtisarların mayın 15-dən başlayacağı və prosesin avqustun 9-da başa çatacağı bildirilib.
