Microsoft-un illik Build inkişaf etdiricilər konfransı gələn həftə baş tutacaq. 19-22 may tarixlərində keçiriləcək tədbirdə süni intellekt sahəsində yeni inteqrasiyalar, xidmətlər və tətbiqlərlə bağlı mühüm yeniliklərin elan ediləcəyi gözlənilir. Əvvəlki illərdə olduğu kimi, builki tədbirin əsas mövzularından birinin də Copilot-un funksiyalarının genişləndirilməsi olacağı ehtimal olunur.
Copilot, Microsoft-un generativ süni intellekt platforması olaraq artıq Windows, Teams və digər məhsullarla inteqrasiya edilib. Bu il isə Copilot-un daha da inkişaf etdirilərək istifadəçi əmrlərini avtonom şəkildə yerinə yetirən “agentik” funksiyalarla təchiz olunacağı bildirilir. Məşhur texnoloji məlumat sızdırıcısı TestingCatalog-un paylaşdığı məlumata görə, Windows Copilot müştərisində “Action” adlı yeni bir düymə sınaqdan keçirilir. Bu düymə vasitəsilə Copilot istifadəçilərin gündəlik əməliyyatlarını avtomatik icra edə bilər.
Digər tərəfdən, OpenAI ilə Microsoft arasında münasibətlərin gərginləşdiyi bir zamanda şirkətin Copilot üçün alternativ model təminatçıları – xAI, Meta, Anthropic və DeepSeek ilə testlər apardığı bildirilir. Bu, Copilot-un texnoloji təməlində dəyişikliklər ola biləcəyinə işarə edir.
Eyni zamanda, Microsoft-un özünün hazırladığı MAI adlı model ailəsini API vasitəsilə təqdim etməyi planlaşdırdığı iddia olunur. Bu modellərin OpenAI-nin texnologiyası ilə rəqabətə girə biləcək səviyyədə olduğu bildirilir. Yeni model ailəsinin təqdimatı məhz Build konfransında baş tuta bilər.
Azure və Çip Texnologiyalarında Yeniliklər
Build 2025 tədbirində Azure bulud platforması üçün hazırlanmış xüsusi süni intellekt çipinin – Maia 100-ün davamı olaraq “Maia 2”-nin elan ediləcəyi gözlənilir. Maia çipləri Microsoft-un AI yönümlü xidmətlərini daha güclü və sürətli etmək üçün hazırlanıb. Analitik Ray Wang-ın sözlərinə görə, “Maia 2” çipinin istehsalı üçün Marvell şirkəti ilə əməkdaşlıq artıq başlanılıb.
Qiymət artımlarına qarşı süni intellekt əsaslı təkmilləşdirmələr
Xatırladaq ki, Microsoft keçən ilin noyabrında Office 365, Microsoft 365 və Windows 365 də daxil olmaqla bir sıra məhsullarının qiymətini 5% artırmışdı. Şirkətin bu artımı əsaslandırmaq üçün Build tədbirində bu məhsullara əlavə olunacaq yeni süni intellekt əsaslı funksiyaları təqdim edəcəyi gözlənilir.
Build 2025-in açılış nitqləri və əsas təqdimatları onlayn olaraq ödənişsiz yayımlanacaq. Bu, inkişaf etdiricilər və texnologiya mütəxəssisləri üçün Microsoft-un AI strategiyasını yaxından izləmək imkanı yaradacaq.
Nəticə olaraq, Build 2025 Microsoft-un süni intellekt və bulud texnologiyalarındakı gələcək istiqamətini müəyyənləşdirəcək əsas tədbirlərdən biri ola bilər. İstər Copilot-un genişlənmiş funksionallığı, istərsə də yeni çip texnologiyaları ilə bağlı gözləntilər, şirkətin innovativ baxışını bir daha təsdiqləyir.
