Tərəflər maliyyə şərtlərinin detallarını açıqlamayıblar, lakin tezliklə yekun müqaviləni imzalamaq üçün çalışdıqlarını bildiriblər. OpenAI sürətlə artan gəlirlərini sabitləşdirmək, idarəetmə strukturunu daha ənənəvi etmək və süni intellektə investisiyalarını maliyyələşdirmək üçün gələcəkdə xalqa açıq şirkətə çevrilməyi planlaşdırır.
Əvvəlki razılaşmaya görə, Microsoft OpenAI-ın proqramlarını yalnız Azure bulud xidməti üzərindən sata bilirdi. Lakin bu il OpenAI, "Stargate" məlumat mərkəzi layihəsi üçün Oracle ilə 300 milyard dollarlıq uzunmüddətli saziş imzalayıb və Google ilə də yeni bulud tərəfdaşlığına başlayıb. Bu addımlar, süni intellektə tələbat artdıqca OpenAI-ın digər bulud provayderləri ilə əməkdaşlıq etmək istəyindən irəli gəlir. Microsoft isə OpenAI modelləri insan zəkasına çatsa belə, bu texnologiyalara çıxışını qorumaq istəyir. Çünki köhnə müqaviləyə əsasən, belə bir inkişaf əməkdaşlığın sona çatmasına səbəb ola bilərdi.
Müqaviləyə əsasən, OpenAI-ın mənfəət güdməyən qolu, şirkətin 500 milyard dollarlıq dəyərinin təxminən 20%-ni, yəni 100 milyard dollardan çox pay alacaq. Bu, OpenAI Fondunu dünyanın ən güclü maliyyə resurslarına malik mənfəət güdməyən təşkilatlarından birinə çevirə bilər.
Şirkətin yenidən qurulması üçün Kaliforniya və Delaverin baş prokurorlarının təsdiqi lazımdır. Bu prosesin ilin sonuna qədər tamamlanması gözlənilir. Əks halda, OpenAI milyardlarla dollarlıq investisiya fürsətini itirmək riski ilə üz-üzədir.
