OpenAI ChatGPT-nin veb axtarış imkanlarını yeniləyərək istifadəçilərə fərdiləşdirilmiş məhsul tövsiyələri təqdim edəcək. Bu yeni funksiyalar məhsul şəkilləri, istifadəçi rəyləri və birbaşa alış linkləri ilə zənginləşdirilib.
Şirkətin açıqlamasına görə, generativ süni intellekt sahəsində öncül olan ChatGPT-nin axtarış xüsusiyyəti ötən il istifadəyə verildikdən sonra böyük maraq qazanıb və təkcə keçən həftə ərzində 1 milyarddan çox veb axtarışı reallaşdırılıb.
Yeni alış-veriş funksiyası OpenAI-nın yeni əsas modeli olan GPT-4o üzərində əlçatan olacaq. Bu yenilik bütün ChatGPT istifadəçiləri üçün — Pro, Plus və pulsuz abunəçilər də daxil olmaqla, hətta giriş etmədən istifadə edənlər üçün də istifadəyə veriləcək.
İstifadəçilər, moda, gözəllik, ev əşyaları və elektronika kimi müxtəlif kateqoriyalar üzrə spesifik suallar verdikdə, fərdiləşdirilmiş məhsul tövsiyələri alacaqlar.
OpenAI vurğulayıb ki, təqdim edilən nəticələrdə reklamlar olmayacaq və ChatGPT üzərindən edilən alışlardan komissiya gəliri əldə olunmayacaq.
Şirkətin məlumatına görə, alış-veriş nəticələri üçün məhsul qiymətləri, təsvirlər və istifadəçi rəyləri kimi üçüncü tərəf mənbələrindən götürülmüş strukturlaşdırılmış metadatalardan istifadə ediləcək və seçimlər tamamilə müstəqil şəkildə formalaşdırılacaq.
Bu addım, OpenAI-nın axtarış bazarında Alphabet şirkətinin (Google-un ana şirkəti) dominant mövqeyinə qarşı daha istifadəçi-mərkəzli alternativ təqdim etmək səylərinin bir hissəsi kimi qiymətləndirilir. OpenAI, reklam əsaslı nəticələrdən fərqli yanaşma sərgiləyir.
Qeyd edək ki, fevral ayında OpenAI-nın həftəlik aktiv istifadəçi sayı 400 milyon nəfəri keçmişdi.
