“Pokémon Go”nun tərtibatçısı Niantic Monster Hunter Now adlanan yeni oyun hazırlayıb. Real dünyada, artırılmış reallıq təcrübəsində baş tutan oyunda əsas missiya məxluqları ovlamaqdır.
Oyunçular məxluqları ovladıqca, daha yaxşı silah və zireh hazırlamaq üçün istifadə edilə bilən müxtəlif materiallar əldə edəcəklər, bu da öz növbəsində daha güclü canavarları ovlamaq üçün istifadə edilə bilər.
Hər zaman Monster Hunter-ın əsas hissəsi olan döyüşlər maksimum 75 saniyə davam edəcək. Bildirək ki, Monster Hunter Now oyununu dostlarınızla da oynaya biləcəksiniz. Niantic-in Tokio studiyasının baş prodüseri Sakae Osumi mətbuat brifinqində "Döyüş elementini sadə və intuitiv etmək istədik, lakin mənimsəmək hələ də çətin ola bilər" deyib.
Oyunun xüsusiyyətləri sadədir, amma Niantic bildirib ki, yaxın gələcəkdə daha çox funksiyalar əlavə ediləcək.
Monster Hunter Now-ın sentyabr ayında iOS və Android sistemləri vasitəsilə istifadəyə verilməsi gözlənilir.
