Qazaxıstan hökuməti gələn il regional startapları və qabaqcıl texnologiyaları dəstəkləmək məqsədilə 1 milyard dollar məbləğində investisiya cəlb etməyi planlaşdırır. Bu məqsədlə yeni vençur kapitalı fondu yaradılacaq.
Bu barədə məlumat Bloomber nəşrində dərc edilib. Mərkəzi Asiyanın ən böyük neft istehsalçısı olan Qazaxıstan, yerli maliyyə texnologiyaları şirkətlərinin, o cümlədən ABŞ-da birja siyahısında olan Kaspi.kz kimi şirkətlərin inkişafına şahidlik edib. Eyni zamanda, hökumət enerji gəlirlərindən asılılığı azaltmağa çalışır. Prezident Kasım-Jomart Tokayev, dövlətin iqtisadiyyatda rolunu azaltmağı və 2029-cu ilə qədər 150 milyard dollar xarici investisiya cəlb etməyi qarşısına məqsəd qoyub.
Yeni yaradılacaq Qazaxıstan Venture Group süni intellekt də daxil olmaqla, ən yeni texnologiyaları maliyyələşdirən qlobal və yerli vençur fondlarına investisiya etməyi planlaşdırır. Bu barədə rəqəmsal, innovasiyalar və aerokosmik naziri məlumat verib.
“Biz istəyirik ki, regionda fəaliyyət göstərən fintech, medtech və süni intellekt sahəsindəki startaplar Qazaxıstana gəlsinlər,” - deyə nazir Jhaslan Madiyev telefon müsahibəsində bildirib. O qeyd edib ki, fond bu startaplara dəstək olacaq və ən perspektivli olanların "unicorn" (milyard dollar dəyərində şirkətlər) səviyyəsinə çatmasına kömək edəcək.
İnvestisiya Planları
Qazaxıstan 2025-ci ilin birinci yarısından etibarən vəsait cəlb etməyə başlayacaq. Milli inkişaf holdinqi Baiterek ilkin olaraq 30 milyon dollar sərmayə yatıracaq. Nazir əlavə edib ki, fondu idarə edəcək nazirliyə bağlı bir qurum artıq özəl investorlarla 90 milyon dollardan çox ilkin razılıq əldə edib.
Madiyev bildirib ki, fondun vəsaitlərinin 30%-i Mərkəzi Asiya və Qafqaz regionuna, qalan hissəsi isə ABŞ və digər beynəlxalq bazarlara yatırılacaq.
Bununla yanaşı, Qazaxıstan hökuməti Yaxın Şərq fondları və qlobal maliyyə institutları ilə də bu yeni təşəbbüs üçün investisiyaların cəlb olunması istiqamətində danışıqlar aparır.
Bu təşəbbüs, Qazaxıstanın iqtisadiyyatını diversifikasiya etmək və texnologiya sahəsində regional mərkəzə çevrilmək istiqamətində mühüm addımdır.
