Müasir smartfon istehsalçısı olan “Nothing” startapı “Tiger Global”ın rəhbərlik etdiyi 200 milyon dollarlıq investisiya raundu ilə startapın dəyəri 1.3 milyard dollara çatdı.
Bu yeni maliyyələşdirmə ilə “Nothing”in indiyə qədər topladığı investisiyanın ümumi miqdarı 450 milyon dolları keçdi.
Startapın qurucusu, əvvəllər "OnePlus"ın da həmtəsisçisi olan Karl Peydir. "Nothing" fərqli dizaynı və texnoloji yanaşması ilə qısa müddətdə böyük uğur əldə edib. Bu ilin əvvəlində startapın ümumi satışları 1 milyard dolları ötüb. Hazırda "Nothing"in qlobal bazar payı 1%-dən az olsa da, ən böyük bazarı olan Hindistanda bu rəqəm 2%-ə çatır.
Gələcəyin Ağıllı Cihazları: Süni İntellekt
Startap yeni investisiyadan əsasən süni intellektə (Sİ) yönəlmiş məhsullar yaratmaq üçün istifadə etməyi planlaşdırır. "Nothing" gələn il tamamilə Sİ-yə əsaslanan yeni cihaz təqdim edəcəyini elan edib.
“Tiger Global”dan Mett Uotçer verdiyi açıqlamada bildirib ki, “Karl və onun komandası şəxsi texnologiyanın gələcəyi üçün avadanlıq və proqram təminatını süni intellektlə yenidən qururlar. Biz onlarla Sİ-yə əsaslanan təcrübələr yaratmaqda əməkdaşlıq etməyə çox həvəsliyik”.
"Nothing" artıq öz əməliyyat sistemində bəzi süni intellekt xüsusiyyətlərini sınaqdan keçirir. Məsələn, “Essential Search” adlı ağıllı axtarış funksiyası istifadəçilərə cihaz daxilində məlumatı tapmağa kömək edir. Startap süni intellekt sahəsindəki işlərə rəhbərlik etmək üçün Selim Benayatl işə götürüb
Bununla belə, süni intellektlə işləyən cihazlar bazarında hələ ki böyük uğurlar əldə edilməyib. Məsələn, “Humane” adlı süni intellekt startapı uğursuz “AI Pin” cihazından sonra “HP”yə satılıb, “Rabbit” isə “R1” cihazında problemləri aradan qaldırmağa çalışır.
Karl Pey düşünür ki, smartfonlar hələ də süni intellekt tətbiqləri üçün ən yaxşı platformadır və yaxın 3-5 il ərzində də belə olaraq qalacaq. "Nothing" məhz bu sahədə irəliləməyi və gənc nəsil istifadəçilərini hədəf alaraq bazarda fərq yaratmağı planlaşdırır.
Yekun olaraq, "Nothing" topladığı bu böyük investisiya ilə özünü smartfon istehsalçısından daha çox, süni intellektə əsaslanan fərqli bir texnologiya startapı kimi təqdim etməyə hazırlaşır. Bu addım startapın gələcəkdə rəqabəti daha da artıracağını göstərir.
