Technest Təqaüd Proqramına qəbul olmaq üçün Bakı üzrə gözlənilən qeydiyyat başlayıb.
Proqramlaşdırma, Data, Kiber-təhlükəsizlik, Biznes Analitikası, Digital Marketing, Qrafik dizayn, UX/UI dizayn, Veb-dizayn, 3D Dizayn kimi müxtəlif sahələr üzrə elan olunmuş təqaüd proqramına müraciət edə bilərsiniz.
Ölkənin aparıcı tədris müəssisələrinə istədiyiniz ixtisas üzrə müraciət edib təqaüd qazana və karyeranızda uğur hekayənizi yaza bilərsiniz.
Proqrama müraciət etmək üçün buraya daxil ola bilərsiniz. Qeydiyyat 10 fevrala qədər davam edəcək.
Məlumat üçün bildirək ki, Technest Təqaüd Proqramı 2021-ci ilin oktyabr ayından Rəqəmsal İnkişaf və Nəqliyyat nazirliyinin təşəbbüsü ilə İnnovasiyalar və Rəqəmsal İnkişaf agentliyinin nəzdində yaradılmışdır. Məqsəd ölkədə İKT sahəsində kadr bankının yaradılması prosesinə töhfə vermək və əmək bazarındakı kadr ehtiyaclarını qarşılamaqdır. Proqram fəaliyyətinin 2021-22 tədris ilində 700-dən çox gəncə təhsil üçün təqaüd ayırmışdır və onların gələcəyin peşəsinə yiyələnməyinə təkan vermişdir. Proqram mütəxəssislərin hazırlanması məqsədilə İKT sahəsində ölkənin öndə gedən tədris mərkəzləri ilə əməkdaşlıq çərçivəsində ən tələbatlı İT kurslarına müsabiqə yolu ilə tələbə qəbulunu təşkil edir.
Müsabiqə bir neçə mərhələdə həyata keçirilir: onlayn müraciət, tədris proqramına uyğun olaraq bir və ya bir neçə imtahan və ən sonda müsahibə mərhələsi. Yalnız bütün mərhələləri uğurla keçmiş namizədlər təqaüddən yararlana bilərlər. Qəbul nəticəsinə əsasən 70%, 90% və 100% təqaüd təyin olunur. Təqaüdə müraciət üçün minimal yaş həddi tədris proqramından asılı olaraq dəyişir.
