TikTok və onun Çin versiyası Douyin 2024-cü ildə 6 milyard dollar in-app alış (IAP) gəliri əldə edərək bu məbləğə çatan ilk oyun olmayan mobil tətbiq oldu. Bu, istifadəçilərin TikTok-un daxili funksiyalarına pul xərcləməsi ilə əldə olunan gəlirdir. Məsələn, istifadəçilər sevdikləri kontent yaradıcılarına virtual hədiyyələr göndərir və ya platformanın müəyyən funksiyalarından yararlanmaq üçün pul ödəyirlər.
TikTok 2024-cü ilin son rübündə (oktyabr-dekabr) 1.9 milyard dollar qazanaraq, tarixi bir rekorda imza atıb. Bu məbləğ təkcə dörd ay ərzində əldə olunub və illik qazancın böyük bir hissəsini təşkil edir. TikTok-un bu uğuru onu digər məşhur tətbiqlərdən fərqləndirir. 2024-cü ildə ən çox gəlir gətirən tətbiq və oyunlar arasında TikTok açıq üstünlük qazanıb. Məsələn, ikinci yeri tutan Monopoly GO adlı mobil oyunun illik gəliri 2.6 milyard dollar olub – bu isə TikTok-un yarısından belə azdır.
Baxmayaraq ki, TikTok qlobal miqyasda ən çox gəlir gətirən tətbiq olub, 2024-cü ilin son rübündə ən çox yüklənən tətbiqlər siyahısında ikinci yerdə qərarlaşıb. Birinci yeri Instagram tutub. Onu WhatsApp, Facebook və Temu izləyib. Bu onu göstərir ki, TikTok istifadəçiləri arasında pul xərcləmə səviyyəsi yüksək olsa da, ümumi yüklənmə sayında bəzi sosial media platformalarından geri qalır.
TikTok-un gəlirlərinin hesablanmasında onun Çin bazarına uyğunlaşdırılmış versiyası – Douyin də nəzərə alınır. Hər iki tətbiq eyni ana şirkətə – ByteDance-ə məxsus olsa da, aralarında mühüm fərqlər var:
Douyin yalnız Çində fəaliyyət göstərir və ölkənin ciddi internet qaydalarına uyğunlaşdırılıb.
TikTok isə beynəlxalq auditoriya üçün nəzərdə tutulub və fərqli məzmun siyasətinə malikdir.
Douyin-in e-ticarət funksiyaları daha güclüdür. Bu, istifadəçilərə tətbiqdən birbaşa məhsullar almaq və satmaq imkanı yaradır. TikTok-da isə belə imkanlar məhduddur.
TikTok-un bu rekord göstəricisi onun maliyyə baxımından böyük uğurlara imza atdığını göstərir. 2023-cü ildə TikTok oyun olmayan tətbiqlər arasında ümumi istifadəçi xərclərində 10 milyard dollar həddini keçən ilk tətbiq olmuşdu.
İndi isə 6 milyard dollarlıq illik gəlir səviyyəsinə çatmaqla TikTok, mobil tətbiq bazarında oyunlardan asılı olmadan yüksək gəlir əldə edə bilən nadir platformalardan biri olduğunu sübut edib.
