TikTok populyarlığı və istifadəçi sayı ilə diqqət çəkən sosial media platforması olsa da, sui-istifadə səbəbilə bir çox ölkədə qadağan olunmağa davam edir. Nepal da TikTok-u qadağan edən ölkələrə qoşulub. Nepalın Rabitə və İnformasiya Texnologiyaları Naziri Rekha Sharma TikTok-un ictimai harmoniyanı pozduğunu və sui-istifadə hallarına nəzarət üçün tələbatın artdığını bildirib. O, qadağanın bazar ertəsi Nazirlər Kabinetinin iclasında qəbul edildiyini açıqlayıb.
Bildirilib ki, Nepalda son 4 ildə TikTok ilə bağlı 1600-dən çox kibercinayət hadisəsi qeydə alınıb. Bununla belə, qadağa qərarı tənqidlərə səbəb olub, çünki bir çox insan digər sosial media platformalarında da arzuolunmaz məzmunun olduğunu və tənzimləmənin aparılmalı olduğunu iddia edib. TikTok-un Nepaldakı qadağası platformanın bütün dünyada qarşılaşdığı tənzimləmə və qadağa problemlərini bir daha gündəmə gətirir.
