Tramp ABŞ-Çin münasibətlərinin gərginləşdiyi bir vaxtda, texnologiya nəhəngi Intel-in CEO-su Lip-Bu Tanın istefasını tələb edib. Tramp, Tanın Çinlə əlaqələrinin olduğu iddialarını əsas gətirərək, CEO-nun ciddi maraq toqquşması vəziyyətində olduğunu və dərhal vəzifəsindən ayrılmasının vacib olduğunu bildirib.
Tramp bu açıqlamanı öz sosial media platforması Truth Social üzərindən verib və mövzu ilə bağlı başqa həll yolunun olmadığını vurğulayıb. Lakin o, Tanın maraq toqquşmasının səbəbləri və ya bununla bağlı hər hansı konkret sübut təqdim etməyib.
Bu tənqidlər fonunda, Respublikaçı senator Tom Katton da Intel-in idarə heyətinə məktub göndərərək, Tanın Çinlə bağlı iddia edilən əlaqələrini araşdırmağı tələb edib. Senator məktubunda Tanın Çin investisiyaları və Cadence Design Systems-də rəhbərliyində olduğu dövrdə şirkətin Çin ordusuna bağlı bir hərbi universitetlə əməkdaşlığı barədə suallar qaldırıb. Katton bu vəziyyəti ABŞ üçün milli təhlükəsizlik təhdidi kimi qiymətləndirir.
Lip-Bu Tan 2025-ci ilin mart ayında Intel-in CEO-su təyin olunub. O, şirkətin süni intellekt sahəsində rəqibləri Nvidia və AMD ilə rəqabət aparması üçün strateji addımlar atıb. Tan dövründə Intel-də işçi sayının azaldılması, yeni istehsal zavodu layihələrinin dayandırılması və şirkətin daha çox mühəndislik yönümlü fəaliyyətə fokuslanması həyata keçirilib.
Qeyd edək ki, Intel, Co Bayden administrasiyası zamanı CHIPS Aktı çərçivəsində 8 milyard dollarlıq subsidiya alıb. Lakin Tramp administrasiyası bu proqramı ləğv edib və ümumilikdə 52 milyard dollarlıq çip subsidiyalarını dayandırıb.
Lip-Bu Tan, Malayziya doğumlu Çin əsilli amerikalı iş adamıdır. O, MIT-də nüvə mühəndisliyi və San Francisco Universitetində biznes sahəsində magistr dərəcələri alıb və yarımkeçirici texnologiyaları sektorunda tanınmış investor və rəhbər kimi fəaliyyət göstərir.
