Rusiyanın iri onlayn ticarət platforması Wildberries taksi xidməti “Citymobil”-i almaq niyyətindədir. Məlumata görə, mümkün razılaşmanın şərtləri hələ açıqlanmayıb.
Wildberries artıq Belarusda “WB Taxi” adlı öz taksi xidmətini sınaqdan keçirir. Test mərhələsinin nə vaxt başa çatacağı bəlli deyil. Şirkət iddialara münasibət bildirərək xəbəri “şayiə” adlandırıb və rəsmi şərh verməkdən imtina edib. “Citymobil” rəhbərliyi də oxşar mövqe bildirib və yayılan məlumatların mənbəyini tanımadıqlarını açıqlayıb.
“Citymobil” 2007-ci ildə yaradılıb. 2019-cu ildə VK və Sberbank şirkətləri bu xidmətin bazasında ortaq müəssisə qurmuşdu. 2022-ci ilin martında isə “Citymobil” fəaliyyətini dayandıracağını elan etmiş, daha sonra brend və texnologiya bazası “Taksoviçkof” şirkətinə satılmışdı.
Son aylarda Wildberries öz fəaliyyət sahəsini genişləndirir: şirkət Özbəkistanda dövlət payına malik poçt operatoru UzPost-u və İnquşetiyada Maqas hava limanını alıb.
