"Nozomio" startapının təsisçisi Arlan Raxmetjanov ilkin mərhələ (pre-seed) investisiya raundunda uğurla 1 milyon dollar investisiya cəlb edib. Qeyd edək ki, investor marağı tələb olunan məbləği də üstələyib.
Raund Arlanın Londona gəldikdən cəmi beş gün sonra bağlanıb. Arlan məktəbin son ilində təhsilini yarımçıq qoyaraq Entrepreneurs First akselerator proqramında iştirak etmək üçün Böyük Britaniyaya köçüb.
"Nozomio" proqramçılar üçün bir platforma qurur: platforma süni intellekt agentlərinin kodu müstəqil şəkildə anlamaq, tapşırıqları yerinə yetirmək və rutin iş axınlarını sürətləndirmək qabiliyyətinə malik olmasına imkan verir. Şirkətin ilk agenti "Nia" hər hansı kod bazasında süni intellekt mühəndisi kimi fəaliyyət göstərir — layihə strukturlarını anlayır və texniki suallara cavab verir.
İnvestisiya raundunun əsas investoru Avropanın ən uğurlu vençur kapital fondlarından biri olan LocalGlobe olub. LocalGlobe daha öncə Figma, Revolut, Wise və Robinhood kimi unikorn startaplara da dəstək vermişdir.
Layihəyə həmçinin Eurasian Hub Ventures vençur klubunun təsisçisi Nurdəulet Bazılbekov da investisiya yatırıb və "Nozomio"nun strateji və maliyyələşmə məsləhətçisi kimi komandaya qoşulub.
Arlan Raxmetjanov bu barədə bildirib:
"Investor marağı 1 milyon dolları keçdi, lakin daha çox investisiya qəbul etsəydim, səhmdarlıq payından daha çox imtina etməli olacaqdım. Sequoia Capital-dan belə təklif gəlmişdi, amma nəzakətlə imtina etdim. Londona yeni enmişdim, LinkedIn-də məktəbi buraxıb buraya köçdüyümü paylaşdım və hər şey elə buradan başladı. İnvestorlar özləri mənimlə əlaqə saxladılar."
Nurdəulet Bazılbekov isə qeyd edib ki, Arlanın uğuru hətta inkişaf etmiş Qərb ekosistemləri üçün belə nadir haldır:
"Cəmi bir neçə gün ərzində Londondakı bütün aparıcı investorlar Arlan haqqında xəbər tutdu. Qazaxıstandan uğurlu startaplar tanıyıram (Remofirst, Causaly, DNA Payments və s.), lakin bu, ilk dəfədir ki, biri yeni gəlib və dərhal sənayenin diqqətini cəlb edir. Bu hadisə sübut edir ki, bizim regiondan olan təsisçilər ilk gündən qlobal düşünə və beynəlxalq dəstək qazana bilərlər."
İnvestisiya raundu klassik SAFE (Gələcək Səhmdar Payı üçün Sadə Razılaşma) modeli əsasında strukturlaşdırılıb. Bu modeldə ilkin maliyyə təmin edilir, lakin səhmdar payı şirkətin dəyərləndirilməsi başa çatdıqdan sonra müəyyən olunur.
Arlan toplanan vəsaiti backend proqramçılarının işə götürülməsi, texniki infrastrukturun genişləndirilməsi və San Fransiskoya köçmək üçün istifadə etməyi planlaşdırır.
