Avropa İttifaqında Telegram-ın işinə nəzarət edən agentlik olacaq

Avropa İttifaqı Telegram messencerinin işinə nəzarət üçün yeni mexanizm hazırlayır. Bu dəfə tənzimləyici rolunu Belçika Poçt Xidmətləri və Telekommunikasiya İnstitutu (BIPT) yerinə yetirəcək.
Belçikanın “De Standaart” nəşri xəbər verir ki, bu qərar messencer vasitəsilə həyata keçirilən narkotik ticarətinin artması ilə əlaqədar qəbul edilib. BIPT tezliklə rəsmi Səlahiyyətli Qurum statusu alacaq, bunun Rəsmi Qəzetdə dərc olunduqdan bir neçə gün sonra baş verməsi gözlənilir. Xidmət sözçüsü Cimmi Smedtsin qeyd etdiyi kimi, bu baş verdikdən sonra institut Telegram-ın fəaliyyətinə effektiv nəzarəti həyata keçirə biləcək.
BIPT-nin messencer tənzimləyicisi kimi seçilməsi Telegram-ın Avropa təmsilçisinin Belçikanın EDSR şirkəti olması ilə bağlıdır. İnstitut platformalarda qeyri-qanuni məzmunun moderasiyasını tənzimləyən Aİ Rəqəmsal Xidmətlər Aktı (DSA) çərçivəsində nəzarət funksiyalarını həyata keçirəcək.
Telegram-a əlavə olaraq, Avropa Komissiyası avqustun sonundan etibarən 18 digər onlayn xidmətə nəzarəti artırdığını elan edib. Siyahıya DSA-nın əhatə etdiyi 17 ən böyük onlayn platforma və iki ən böyük onlayn axtarış motoru daxildir. Bu siyahı 17 fevral 2023-cü il tarixinədək xidmətlər tərəfindən təqdim edilən istifadəçi məlumatlarına əsaslanır.
DSA-ya görə, 45 milyondan çox aktiv istifadəçisi olan xidmətlər qanunu pozduqlarına görə şirkətin qlobal dövriyyəsinin 6%-nə qədər cərimə ilə üzləşirlər.