WeTravel çoxgünlük və fərdiləşdirilmiş səyahətlərin təşkili üçün proqram təminatı hazırlayan Yeni Zelandiya şirkəti Tourwriter-i satın alıb.
Şirkətin CEO-su Ted Clements bildirib ki, bu addım WeTravel-in çoxgünlük səyahət biznesləri üçün süni intellekt əsaslı vahid əməliyyat sistemi yaratmaq strategiyasının bir hissəsidir. WeTravel ötən il 92 milyon dollarlıq Series C investisiya raundu cəlb etmişdi.
Tourwriter 20 ildən artıqdır ki, lüks və fərdi səyahətlər təşkil edən tur operatorları və DMC-lər üçün proqram təminatı təqdim edir. Platforma rəqəmsal səyahət proqramlarının hazırlanması, təchizatçı bazasının idarə edilməsi, qiymət təkliflərinin hazırlanması, marja və komissiyaların hesablanması, fakturaların idarə edilməsi, mühasibat inteqrasiyası və analitika kimi funksiyaları bir araya gətirir.
Tourwriter-in müasir bulud əsaslı versiyasının inkişafı 2020-ci ildə başlayıb. Şirkətin məlumatına görə, son iki ildə Tourwriter müştəriləri platforma üzərindən ümumilikdə 1 milyard dollardan çox dəyərində səyahət satışı həyata keçirib. Şirkətin müştəriləri hazırda 35 ölkədə fəaliyyət göstərir.
WeTravel hesab edir ki, Tourwriter-in fərdi səyahətlərin hazırlanması üzrə təcrübəsinin şirkətin ödəniş infrastrukturu və süni intellekt imkanları ilə birləşdirilməsi tur operatorlarının gündəlik iş yükünü azaltmağa imkan verəcək.
Tourwriter müştəriləri üçün dəyişiklik olmayacaq
WeTravel bildirib ki, satınalmadan sonra Tourwriter ayrıca platforma kimi fəaliyyətini davam etdirəcək. Müştərilər eyni məhsuldan, komandadan və dəstək xidmətlərindən istifadə etməyə davam edəcəklər.
Tourwriter-in təsisçisi Glenn şirkətə rəhbərlik etməyə davam edəcək. Təxminən 30 nəfərlik komanda isə Yeni Zelandiya, London və dünyanın müxtəlif ölkələrində fəaliyyətini davam etdirəcək.
WeTravel gələcəkdə Tourwriter istifadəçilərinə yeni ödəniş imkanları və süni intellekt əsaslı alətlər təqdim etməyi planlaşdırır.
Şirkətin 2026-cı il üzrə hesabatına əsasən, 2025-ci ildə tur operatorlarının 56%-i fərdi lüks səyahətlərə marağın artdığını bildirib. WeTravel-in məlumatına görə, 2026-cı ilin ilk yarısında platformadakı köklü fərdi və lüks səyahət təşkilatçılarının bronlarının sayı illik müqayisədə 16%, pul ifadəsində isə 31% artıb.
Şirkət hesab edir ki, fərdiləşdirilmiş səyahətlərə tələbin artması fonunda bu sahədə istifadə olunan köhnə sistemlərin və mürəkkəb ödəniş proseslərinin avtomatlaşdırılması turizm biznesləri üçün əsas prioritetlərdən birinə çevriləcək.
Qeyd edək ki, WeTravel startapı 2014-cü ildə Yohannes Koeppel (CEO), həmyerlimiz Qərib Mehdiyev (CTO) və Zaki Prabovo (CMO) tərəfindən təsis edilib. Platforma səyahət təşkilatçılarına ödənişlərin qəbulundan tutmuş logistikanın idarə edilməsinə qədər geniş alətlər təqdim edir.
