Cek Dorsi və Cey Zi Nyu Yorkun aşağı gəlirli şəxsləri üçün pulsuz dərslər təklif edən Bitkoin akademiyası qurublar. Bu barədə onlar öz tvitlərində məlumat verib.
Əldə olunan məlumata görə, həm fiziki, həm də onlayn şəkildə keçiriləcək dərslər iyunun sonundan sentyabr ayına kimi davam edəcək. Həftədə iki dəfə keçiriləcək bu dərslər onların öz maliyyə azadlığına nail olmaq məqsədi daşıyır. Akademiyanın təlimçiləri Black Bitcoin Billionaire saytının administratoru Lamar Uilson və Crypto Blockchain Plug-un yaradıcısı Nacah C. Robertsdir.
Bildirilir ki, proqram çərçivəsində iştirakçılara smartfonlar, internetə qoşulmaq üçün MiFi cihazları, az miqdarda Bitcoin və bir illik data paketi təklif olunacaq. Akademiya uşaqlarla yanaşı, böyükləri də kriptovalyutalar haqqında maarifləndirməyi planlaşdırır. Bu çərçivədə həftə sonu proqramları ilə bölgədəki uşaqlar mövzu haqqında daha şüurlu olacaqlar.
Həmçinin kurrikulumun məzmunu iştirakçıların bilik səviyyəsinə, keçmiş təcrübələrinə və sosial mühitinə uyğun olaraq dəyişəcək. Lakin onun əsasən kriptovalyutalara giriş, blokçeynin iş prinsipləri və fırıldaqçılığın necə aşkar oluna biləcəyini əhatə edəcəyi gözlənilir.
Məlumat üçün onu da qeyd edək ki, Cek Dorsi və Cey Zinin maliyyələşdirdiyi akademiyanın əməliyyat idarəçiliyini Cey-Zin anası Qloriya Karterin həmtəsisçisi və baş direktoru olduğu Shawn Carter Foundation idarə edəcək.
