Meta, Facebook-un tanışlıq platformasını yeniləyərək süni intellektlə (AI) işləyən yeni köməkçi təqdim etdiyini açıqlayıb. Bu yeni xüsusiyyət, istifadəçilərə axtarışlarını dəqiqləşdirməyə, uyğun profillər tapmağa və profil məlumatlarını təkmilləşdirməyə kömək etmək üçün nəzərdə tutulub.
Bu süni intellektli köməkçi ilə istifadəçilər daha spesifik tələblər irəli sürə bilərlər. Məsələn, "texnologiya sahəsində işləyən Brooklyn-dən qız" kimi axtarışlar aparmaq və ya profillərini daha cəlbedici etmək üçün Sİ-dən məsləhətlər almaq mümkün olacaq.
Meta həmçinin, istifadəçilərin "sürüşdürmə yorğunluğunu" azaltmaq üçün "Meet Cute" funksiyası da əlavə edib. Bu xüsusiyyət, alqoritmlərə əsaslanaraq hər həftə istifadəçilərə "sürpriz uyğunluq" təklif edir.
Facebook Dating, son bir ildə 18-29 yaş arası istifadəçilər arasında 10% böyümə göstərsə də, hələ də Tinder (gündəlik 50 milyon aktiv istifadəçi) və Hinge (gündəlik 10 milyon aktiv istifadəçi) kimi rəqiblərdən geri qalır.
Bu addım, tanışlıq tətbiqləri bazarında süni intellektin artan rolunu bir daha təsdiqləyir. Tinder və Hinge-in sahibi olan Match Group şirkəti, keçən il OpenAI ilə tərəfdaşlıq quraraq süni intellektə 20 milyon dollardan çox sərmayə qoyub. Bu investisiya nəticəsində Tinder-də Sİ ilə profil şəkli seçmə və uyğunluq tapma alətləri, Hinge-də isə istifadəçilərin cavablarını yaxşılaşdırmaq üçün süni intellektdən istifadə edən funksiyalar yaradılıb.
Bumble kimi digər tanışlıq tətbiqləri də oxşar AI funksiyaları təqdim edir. Bəzi proqnozlara görə, gələcəkdə istifadəçilərin şəxsi "süni intellektli konsyerjləri" digər insanların AI köməkçiləri ilə görüşərək uyğunluğu müəyyən edə biləcək.
