Süni intellekt sahəsində böyük oyunçular arasında əməkdaşlıqlar dəyişir. Reuters agentliyinin məlumatına görə, Google bu il Scale AI-a 200 milyon dollar ödəməyi planlaşdırsa da, indi bu əməkdaşlığı dayandırmaq və alternativ tərəfdaşlarla işləmək niyyətindədir. Microsoft da Scale ilə münasibətləri yenidən nəzərdən keçirir, OpenAI isə aylar əvvəl bu istiqamətdə addım atıb. Hərçənd, OpenAI-nin maliyyə direktoru bildirib ki, Scale hələ də onların bir neçə təchizatçısından biridir.
Scale AI – əsasən süni intellekt modellərini öyrətmək üçün məlumatları təhlil və etiketləmə bacarığı olan insan resurslarına çıxış imkanı təqdim edir. Şirkətin müştəriləri arasında özünüidarə edən avtomobil istehsalçıları və ABŞ hökuməti də var. Lakin əsas müştəri qrupu generativ süni intellekt sahəsində fəaliyyət göstərən şirkətlərdir.
Meta-nın Scale AI-a etdiyi böyük sərmayə – təxminən 14.3 milyard dollar qarşılığında şirkətin 49%-lik payının alınması – digər texnologiya nəhəngləri üçün narahatlıq yaradıb. Məlumata görə, bu sərmayədən sonra Scale AI-ın baş direktoru Aleksandr Vanq Meta-ya keçərək, “superintellekt” sahəsində işlərə rəhbərlik etməyə başlayıb.
Bu dəyişikliklər fonunda Google Scale ilə əməkdaşlıqdan imtina etməyə hazırlaşsa da, şirkət məsələyə dair rəsmi açıqlama verməyib. Scale sözçüsü də Google ilə münasibətlər barədə konkret fikir bildirməsə də, TechCrunch-a açıqlamasında bildirib ki, şirkətin fəaliyyəti sabitdir və müştəri məlumatlarının təhlükəsizliyini qoruyaraq müstəqil şəkildə fəaliyyətini davam etdirir.
Meta-nın Scale AI-a yatırdığı nəhəng investisiya bazarda güc balansını dəyişə bilər. Digər texnoloji şirkətlərin bu əməkdaşlıqdan çəkilməsi isə süni intellekt sektorunda rəqabətin daha da kəskinləşəcəyinə işarə edir. Bu hadisə həm də göstərir ki, kritik texnoloji tərəfdaşlıqlar yalnız texniki imkanlarla deyil, eyni zamanda etimad və məlumat təhlükəsizliyi ilə müəyyən olunur.
