Google yeni nəsil süni intellekt əsaslı video generatoru Veo 3.1 modelini istifadəyə verib. Şirkətin açıqlamasına görə, bu versiya əvvəlkilərlə müqayisədə daha keyfiyyətli səs, realist vizual detalları və dəqiq sorğu uyğunluğunu təmin edir. Maksimum video uzunluğu 8 saniyə, təsvir keyfiyyəti isə 720p təşkil edir. Model həm şaquli, həm də üfüqi formatları dəstəkləyir.
Yeni versiya Google-un Flow servisi vasitəsilə əlçatandır. İstifadəçilərə pulsuz olaraq beş video yaratmaq imkanı verilir. Bundan sonra xidmət Google AI Pro abunəsi ilə ayda 20 dollar qarşılığında təqdim olunur.
Bundan əlavə, Google Flow platformasında video montaj funksiyasını da istifadəyə verib. Bu funksiya səsli redaktəni dəstəkləyir, kadrlara musiqi və nitq əlavə etmək, obyektləri çıxarmaq və ya əlavə etmək, həmçinin videonu bir dəqiqəyə qədər uzatmaq imkanı yaradır.
Veo 3.1 həmçinin Gemini tətbiqinə inteqrasiya olunub və yalnız abunəçilər üçün aktivdir. İnkişaf etdiricilər modeli Gemini API və Vertex AI üzərindən də sınaqdan keçirə bilərlər.
