Son vaxtlar süni intellektlə işləyən proqramlaşdırma vasitələri çox populyar olub və bir çox böyük texnologiya şirkətləri öz bu cür alətlərini hazırlayır. Google da bu trendlə ayaqlaşaraq ABŞ istifadəçiləri üçün Opal yeni “vibe-coding” alətini sınaqdan keçirir.
Opal vasitəsilə istifadəçilər sadəcə yazılı təlimat verərək kiçik veb tətbiqlər yarada və ya mövcud tətbiqləri redaktə edə bilərlər. Yəni proqramlaşdırma bilmədən, yalnız fikirlərini yazmaqla tətbiq hazırlamaq mümkündür.
Tətbiq hazır olduqdan sonra istifadəçilər onun yaradılma mərhələlərini vizual şəkildə görə, istədikləri hissəni dəyişdirə və əlavə etmək istədikləri funksiyaları əlavə edə bilərlər.
Həmçinin, istifadəçilər yaratdıqları tətbiqləri internetdə paylaşa və başqalarının da öz Google hesabları ilə onu sınamasına imkan verə bilərlər.
Google-un bu aləti, proqramlaşdırma bilikləri olmayan insanlara da öz ideyalarını asanlıqla reallaşdırmaq şansı verir. Bu sahədə Canva, Figma və Replit kimi digər şirkətlərlə rəqabət aparır.
Opal proqram yaratmaq prosesini sadələşdirərək daha çox insana yaradıcılıq imkanı verir.
