Süni intellekt şirkəti Higgsfield-in həmtəsisçisi və baş direktoru Alex Mashrabov Qazaxıstan vətəndaşlığı əldə edib. Ölkə prezidenti Kasım-Jomart Tokayev bununla bağlı müvafiq sərəncamı oktyabrın 30-da imzalayıb. Bu barədə Qazaxıstanın Rəqəmsal İnkişaf, İnnovasiyalar və Aerokosmik Sənaye naziri Jaslan Madiyev məlumat verib.
Qazaxıstan pasportunu Mashrabova şəxsən nazir təqdim edib. Madiyevin sözlərinə görə, ölkə beynəlxalq səviyyədə rəqabət apara biləcək süni intellekt mütəxəssislərini və texnoloji layihələri öz ekosisteminə cəlb etməkdə maraqlıdır.
Alex Mashrabov süni intellekt vasitəsilə şəkil və video yaratmağa imkan verən Higgsfield AI platformasının həmtəsisçisidir. O, şirkəti Yerzat Dulat ilə birlikdə qurub.
Sahibkarın ailə kökləri Özbəkistanla bağlıdır. Atası Özbəkistandandır. Bununla belə, Mashrabovun Qazaxıstan vətəndaşlığını qəbul etməzdən əvvəl hansı ölkənin pasportuna sahib olduğu barədə açıq məlumat yoxdur.
