İlon Maskın sahibi olduğu X (keçmiş Twitter) Donald Trampın 2021-ci ildəki qadağasına görə açdığı məhkəmə iddiasını həll etmək üçün ona 10 milyon dollar ödəməyə razılaşıb.
Sözügedən məhkəmə iddiası Twitter-in 6 yanvar hadisələrindən sonra Trampın hesabını bağlamaq qərarına qarşı idi. Həmin gün Trampın tərəfdarları ABŞ Konqresinə hücum etmişdi. Trampın komandası əvvəllər Mask ilə yaxın münasibətləri nəzərə alaraq məhkəmə iddiasını davam etdirməməyi düşünürdü. Lakin, buna baxmayaraq, Tramp razılaşmanı yekunlaşdırmağa qərar verdi.
Mask 2022-ci ildə Trampın Twitter hesabını bərpa edib və 2024-cü il prezident seçki kampaniyası üçün Trampa 250 milyon dollardan çox vəsait ayırıb. Bu həftə isə Mask və Tramp Ağ Evdə birgə mətbuat konfransı keçiriblər.
Həmçinin, yanvar ayında Meta da oxşar bir məhkəmə iddiasını həll etmək üçün 25 milyon dollar ödəməyə razılaşıb.
