OpenAI-nin həmtəsisçisi və tanınmış süni intellekt tədqiqatçısı İlya Sutskever, 2024-cü ildə təsis etdiyi “Safe Superintelligence” (SSI) startapında baş direktor (CEO) vəzifəsini rəsmi olaraq öz üzərinə götürüb. Bu barədə o, iyulun 3-də X sosial şəbəkəsində paylaşım edib.
Bu rəhbərlik dəyişikliyi, şirkətin digər həmtəsisçisi və indiyədək baş direktoru olmuş Daniel Gross-un 29 iyun tarixində vəzifəsindən ayrılması ilə bağlıdır. Eyni zamanda, həmtəsisçi Daniel Levi şirkətin prezidenti təyin edilib.
Sutskever bu qərarın, Meta şirkətinin rəhbəri Mark Zukerberqin SSI-ni tam olaraq satın almaq və həm Gross-u, həm də onun tərəfdaşı, keçmiş GitHub rəhbəri Nat Fridmanı şirkətə cəlb etmək istədiyi barədə yayılan xəbərlərin fonunda verildiyini bildirib. Sutskever yayılan iddialara belə münasibət bildirib:
“Bəzi şirkətlərin bizi almaq istədiyini eşitmiş ola bilərsiniz. Bu marağa görə minnətdarıq, lakin biz yalnız bir məqsədə — təhlükəsiz süni intellektin yaradılmasına sadiqik. Komandamız, hesablama gücümüz və vizyonumuz var. Yolumuza davam edirik.”
2024-cü ildə əsası qoyulan “Safe Superintelligence” şirkəti, adından da göründüyü kimi, yalnız təhlükəsiz süni intellektin inkişafına fokuslanıb. Şirkətin nə alternativ məhsulu, nə də fərqli biznes planı var. Bu yanaşma onu digər texnoloji startaplardan fərqləndirir və elmi məqsədlərə sadiq qalmaqla seçilir.
Sutskever əvvəllər OpenAI-də baş elmi işçi kimi çalışıb. İndi isə o, SSI-də həm texniki rəhbərlik, həm də CEO olaraq strateji qərarların verilməsinə cavabdehdir. Bu, onun üçün həm maliyyə resurslarını cəlb etmək, həm də yüksək səviyyəli tədqiqatçılarla əməkdaşlıq qurmaq baxımından yeni mərhələdir.
Daniel Gross-un Metada fəaliyyətə başlama ehtimalı yüksəkdir. Mark Zukerberq artıq OpenAI və Google DeepMind-dan tanınmış tədqiqatçıları cəlb edərək yeni süni intellekt laboratoriyası qurur. Meta-nın strategiyası süni intellekti gündəlik istifadəçi məhsullarına inteqrasiya etmək üzərində qurulub.
Bunun əksinə olaraq, SSI-nin əsas və yeganə məqsədi təhlükəsiz süni intellektin yaradılmasıdır. Şirkət kommersiya məqsədlərindən uzaq, fundamental və etik prinsiplərlə fəaliyyət göstərir.
İlya Sutskever-in CEO təyinatı süni intellekt sahəsində strateji önəm daşıyır. Bu dəyişiklik, texnoloji ekosistemdə süni intellektin inkişafı uğrunda gedən rəqabətdə SSI-nin mövqeyini daha da gücləndirə bilər. Sutskever-in liderliyi ilə şirkət bu sahədə qlobal diqqət mərkəzində qalmağa davam edəcək.
