Meta tərəfindən təşkil edilən Connect tədbirində süni intellekt texnologiyalarının Instagram-a necə inteqrasiya olunacağı ilə bağlı bəzi məlumatlar paylaşılıb.
Yeni təqdim edilən "Restyle" adlı alət istifadəçilərə süni intellekt tərəfindən dəstəklənən müxtəlif üslub və mövzularda mövcud fotoşəkillərini yenidən dizayn etməyə imkan verəcək. Məsələn, istifadəçi öz şəklini "akvarel" effekti ilə və ya "jurnal kollajı" üslubunda düzəldə biləcək.
Bundan əlavə, "fon" adlı başqa bir xüsusiyyət də təqdim edilib. Bu funksiya ilə istifadəçilər şəkillərinin fonunu tez bir zamanda dəyişdirə biləcəklər.
Meta bu yeni xüsusiyyətlərlə yaradılan məzmunun istifadəçilərə süni intellektlə yaradıldığını göstərən xüsusi etiketlə paylaşılacağını qeyd edib. Bu, istifadəçilərə paylaşılan məzmunun süni intellekt tərəfindən redaktə olunduğunu anlamağa kömək edəcək. Həmçinin, Meta Instaqramda istifadə olunacaq süni intellekt dəstəkli stiker funksiyasını da təqdim edib. Bu funksiya istifadəçilərə mətnlərdən istifadə edərək tez bir zamanda fərdi stikerlər yaratmağa imkan verəcək. Bildirilib ki, bu süni intellekt dəstəkli stikerlər tezliklə ingilis dili variantı ilə istifadəçilərə təqdim olunacaq.
