Instagram Hindistanda yeniyetmələr üçün nəzərdə tutulmuş hesabları təqdim etdiyini açıqlayıb. Bu yenilik Hindistanda 350 milyondan çox istifadəçisi olan platformanın təhlükəsizlik tədbirlərini gücləndirməyi hədəfləyir.
Keçən il Meta bu hesabları ABŞ, Böyük Britaniya, Kanada və Avstraliyada istifadəyə verdi. 16 yaşdan kiçik istifadəçilərin hesabları avtomatik olaraq bu yeniyetmə hesablarına köçürüldü. Bu hesablar şəxsi (private) olur və mesajlaşma məhdudiyyətləri, məzmun nəzarəti, vaxt limitləri və "yuxu rejimi" kimi funksiyaları əhatə edir.
Instagram-ın Hindistandakı İctimai Siyasət Direktoru Natasha Jog deyib: "Meta olaraq təhlükəsiz və məsuliyyətli rəqəmsal mühit yaratmaq əsas prioritetimizdir. Yeniyetmə hesablarını Hindistana genişləndirməklə biz valideynlərə dəstək göstərməklə yanaşı, məzmun nəzarətini gücləndiririk və yeniyetmələr üçün daha təhlükəsiz təcrübə təmin edirik."
Yeniyetmə hesabları istifadəçilərin bəzi parametrləri valideyn icazəsi olmadan dəyişməsinə mane olur. Valideynlər, hətta 16 yaşdan böyük uşaqların hesablarına nəzarət funksiyasını aktivləşdirə bilərlər.
Valideynlər uşaqlarının kimlərlə ünsiyyət qurduğunu görə bilsələr də, mesajların məzmununa baxa bilməzlər. Həmçinin gündəlik istifadə limitləri təyin edə və müəyyən saatlarda tətbiqi bloklaya bilərlər.
Məzmun baxımından Meta yalnız istifadəçilərin tanıdıqları şəxslərdən mesaj almasına icazə verir. Yeniyetmələr yalnız izlədikləri şəxslər tərəfindən etiketlənə bilər. Həmçinin şirkət avtomatik olaraq təhqiredici söz və ifadələri süzgəcdən keçirir. Kəşf (Explore) bölməsində döyüş və kosmetik məhsulların təbliği kimi məzmunlar da aradan qaldırılır.
Yeniyetmələr futbol, əl işləri, rəqs, musiqi, pişiklər, yemək və kompüter elmləri kimi mövzuları seçərək öz Kəşf səhifələrini fərdiləşdirə bilərlər.
Meta istifadəçi yaşını təsdiqləmək üçün şəxsiyyət vəsiqəsi yoxlaması və video selfilər kimi metodlardan istifadə edir. Hindistanda yaxın zamanda təqdim olunan qanun layihəsinə görə, şirkətlər 18 yaşdan kiçik istifadəçilərin məlumatlarını valideyn razılığı olmadan emal edə bilməzlər. Bu qaydalar qəbul edilsə, platformaların əlavə təhlükəsizlik tədbirləri görməsi tələb oluna bilər.
