Tanınmış investor Uorren Baffetin tənqidindən sonra Kraft Heinz şirkətinin səhmləri təxminən 7% dəyər itirib. Baffet, CNBC-yə verdiyi müsahibədə şirkətin iki fərqli hissəyə ayrılma planından məyus olduğunu dilə gətirib. O, bu addımı məcbur bir həll yolu saymadığını açıqlayıb.
Qeyd edək ki, 2015-ci ildə Kraft və Heinz şirkətlərinin birləşməsinin əsas təşəbbüskarı Baffet idi. O, bu addımın mükəmməl fikir olmadığını etiraf etsə də, onları yenidən ayırmağın da problemləri həll etməyəcəyini vurğulayıb.
Bölünmə planına görə, şirkət iki yeni quruma ayrılacaq:
- Şimali Amerika Qida Şirkəti (təxminən 10 milyard dollar dəyərində) – Oscar Mayer, Kraft Singles və Lunchables kimi məhsulları əhatə edəcək.
- Global Taste Elevation (təxminən 15 milyard dollar dəyərində) – Heinz ketçup, Philadelphia krem pendiri, Kraft Mac & Cheese və digər məşhur markaları özündə birləşdirəcək.
Birləşmədən sonra Kraft Heinz maliyyə baxımından çətinliklər yaşayıb. Şirkət 57 milyard dollar bazar dəyəri itirib, 2019-cu ildə 15 milyard dollar həcmində zərərə məruz qalıb, 2025-ci ilin ikinci rübündə isə 9.3 milyard dollar itki ilə üzləşib.
