Məhkəmə sənədlərinə görə, Meta şirkəti süni intellekt modelləri üçün kitab nəşriyyatları ilə müqavilələr bağlamağı dayandırıb.Bu, Meta şirkətinə qarşı müəllif hüquqları pozulması iddiaları ilə əlaqədar məhkəməyə təqdim edilən sənədlərdə yer alıb. Hal-hazırda Meta bir neçə müəllif hüquqları iddiası ilə üzləşib. Bunlardan birində müəlliflər bildirirlər ki, Meta onların kitablarını süni intellektin təlimi üçün qanunsuz istifadə edib. Meta isə bu təlim prosesini "ədalətli istifadə" prinsipi çərçivəsində həyata keçirdiyini iddia edir.
Məhkəmə sənədlərinə görə, Meta şirkətinin AI tərəfdaşlıq rəhbəri Sy Choudhury bildirib ki, kitab nəşriyyatları ilə əlaqə yaratmağa çalışıblar, amma bu sahədə çox maraq görməyiblər. Bəzi nəşriyyatlar əməkdaşlığa açıq olub, amma çoxu müəllif hüquqları ilə bağlı problemlər səbəbindən lisenziya təklif edə bilməyib.
Choudhury əlavə edib ki, bədii kitab nəşriyyatları ilə danışıqlarda çətinliklər olub, çünki bəzi nəşriyyatlar müəllif hüquqlarını tam olaraq üzərlərinə götürmədiklərini bildiriblər. Bu da hər bir müəlliflə ayrıca razılaşma aparmağı tələb edir ki, bu da zaman alır.
Müəlliflər Meta-nı "kölgə kitabxanaları" adlanan qeyri-rəsmi elektron kitab mənbələrindən istifadə etməkdə ittiham edirlər. Onların iddialarına görə, Meta süni intellekt modellərini öyrətmək üçün qanunsuz yolla əldə edilən kitabları istifadə edib və hətta torrent texnologiyası ilə bu kitabları yükləyib. Torrent istifadəsi müəllif hüquqlarının pozulması kimi qiymətləndirilə bilər, çünki bu zaman kitablar həm yüklənir, həm də paylaşılır.
İşə baxan məhkəmə, Meta-nın müəllif hüquqları pozub-pozmadığını araşdırır. Müəlliflər iddia edirlər ki, Meta pirat kitabları rəsmi lisenziyalı kitablarla müqayisə edərək hansı materialları istifadə etməli olduğunu müəyyən edib. Əgər bu iddialar doğru çıxarsa, Meta ciddi hüquqi və maliyyə məsuliyyəti ilə üzləşə bilər.
