Meta süni intellekt sahəsində böyük dəyişikliklərə başlayıb. Şirkət əvvəlki quruluşunu ləğv edərək onu dörd yeni bölməyə ayırır. Bu barədə işçilərə artıq rəsmi məlumat verilib.
Yeni strukturun adı Meta Superintelligence Labs (MSL) olacaq. Onun əsas hissəsi TBD Labs adlanır və bu bölməyə iyun ayında Meta-ya qoşulan Baş Süni İntellekt Direktoru Aleksandr Vanq rəhbərlik edəcək. TBD Labs daha çox Llama kimi böyük süni intellekt modellərinin inkişafına diqqət yetirəcək. Digər üç bölmə isə tədqiqat, məhsullara tətbiq və infrastruktur sahələrinə fokuslanacaq.
Meta son vaxtlar süni intellektə daha çox sərmayə yatırır. Bunun səbəbi şirkətin OpenAI, Anthropic və Google DeepMind kimi rəqiblərindən geri qalmaq istəməməsidir. Hətta Mark Zukerberq özü də yeni komanda üçün işçi seçiminə şəxsən qatılıb.
Bu dəyişikliklərlə Meta süni intellektdə mövqeyini gücləndirməyi, yeni texnologiyalar hazırlamağı və bazarda daha güclü rəqabət aparmağı hədəfləyir.
