Meta, Facebook və Instagram istifadəçilərinin daha geniş auditoriyaya çıxması üçün yeni süni intellekt əsaslı səs tərcümə funksiyasını istifadəyə verib. Funksiya hazırda Meta AI-nin mövcud olduğu bütün ölkələrdə əlçatan olacaq.
Yeni imkan yaradıcıların videolarını başqa dillərə tərcümə edərkən onların öz səs tonu və tərzini qoruyur, beləliklə, tərcümə olunmuş səs daha təbii səslənir. Həmçinin, dodaq hərəkətlərinə uyğunlaşdırma (lip-sync) seçimi də əlavə olunub ki, bu da tərcüməni daha real göstərir.
Başlanğıc mərhələdə funksiya yalnız ingilis və ispan dilləri arasında iki istiqamətli tərcüməni dəstəkləyir, amma zamanla daha çox dil əlavə ediləcək. Facebook-da ən azı 1.000 izləyicisi olan yaradıcılar və bütün açıq Instagram hesabları bu funksiyadan yararlana biləcəklər.
Funksiyanı aktivləşdirmək üçün istifadəçilər reel paylaşmadan əvvəl “Translate your voice with Meta AI” seçimindən istifadə edə bilərlər. Paylaşım etməzdən əvvəl tərcüməni önizləmək, lip-sync-i qoşmaq və ya söndürmək mümkündür.
Meta həmçinin yaradıcılar üçün “izlənmə dili” adlı yeni göstərici də əlavə edib. Bu metrik sayəsində kontentin hansı dillərdə daha çox izlənildiyi görünəcək və yaradıcılar auditoriyalarını daha yaxşı anlaya biləcəklər.
Bundan əlavə, Facebook yaradıcıları öz səslərini yükləyərək 20 fərqli dublaj əlavə edə bilərlər. Bu, onlara yalnız ingilis və ispan dili auditoriyasına deyil, digər bazarlara da çıxış imkanı yaradacaq.
Meta bildirir ki, gələcəkdə daha çox dil dəstəklənəcək. Instagram rəhbəri Adam Mosseri isə bu barədə belə deyib:
“Biz inanırıq ki, çox sayda yaradıcı var və onların potensial izləyiciləri fərqli dillərdə danışır. Əgər bu funksiyalar vasitəsilə yaradıcıların məzmunu dil və mədəniyyət baryerlərini aşaraq daha çox insana çata bilsə, onların izləyici sayı da artacaq.”
Meta-nın bu addımı şirkətin süni intellekt sahəsindəki yenidənqurma prosesinə də paralel şəkildə təsadüf edir. Şirkət hazırda fəaliyyətini dörd əsas istiqamətə – tədqiqat, superintellekt, məhsullar və infrastruktur bölərək inkişaf etdirir.
