Fransa mediası franceinfo, Telegram rəhbəri Pavel Durovun dekabrın əvvəlində Fransada keçirilən dindirilməsi ilə bağlı detalları bölüşüb.
Bu dindirilmə barədə ilk dəfə dekabrın 6-da məlumat yayılıb. Həmin vaxt Fransa mediası Pavel Durovun avqust ayında saxlanılmasından sonra ilk dəfə Parisdə ifadə verdiyini bildirmişdi.
Yeni məlumatlara görə, dindirilmə zamanı Pavel Durov bildirib ki, Telegram hər ay qaydaların pozulmasına görə dünya üzrə 15-20 milyon istifadəçi hesabını silir.
“Telegram cinayətkarlar üçün platforma kimi yaradılmayıb,” - deyə o qeyd edib. Durov əlavə edib ki, qayda və qanunları pozan şəxslərin mesajlaşma platformalarını və sosial şəbəkələri sui-istifadə etməsi problemi təkcə Telegram-a xas deyil.
O vurğulayıb ki, Telegram uşaq pornografiyası ilə çox ciddi mübarizə aparır: “Biz onu platformada yayımlandığı gün silirik.”
Durov əlavə edib ki, Telegram uşaq istismarına qarşı mübarizə aparan bir neçə təşkilatla əməkdaşlıq edir. Lakin hakimlər qeyd edib ki, bu təşəbbüs yalnız Durovun saxlanılmasından sonra irəli sürülüb:
“Mən yalnız polis nəzarətində olarkən bu faktların ciddiliyini tam dərk etdim,” - deyə Pavel Durov etiraf edib.
Durov son altı ay ərzində Telegram-ın dünya üzrə hüquq-mühafizə, təhlükəsizlik və məhkəmə qurumlarına 10 000 istifadəçi məlumatı qeydi təqdim etdiyini bildirib. Avqustun sonu ilə sentyabrın sonu arasındakı dövrdə Telegram Fransa Yetkinlik Yaşına Çatmayanlarla İş İdarəsinin (OFMIN) göndərdiyi təxminən 100 müraciətin hamısına cavab verib.
Lakin bu rəqəm Fransa hakimiyyət orqanlarının hər il göndərdiyi müraciətlərin sayından xeyli azdır və Telegram indiyə qədər bu müraciətlərin bir çoxuna cavab verməyib.
Eyni zamanda, məhkəmə bildirir ki, son aylarda Telegram-dan cinayətkarların istifadəsi daha da artıb.
2024-cü ilin ilk beş ayında yalnız Fransa jandarmeriyası tərəfindən 535 cinayət işi açılıb. Bu rəqəm 2023-cü il üzrə ümumilikdə 808 işlə müqayisə olunur. 2017-ci ildən 2024-cü ilə qədər isə Telegram vasitəsilə törədilmiş cinayətlərə dair 2000 iş qeydə alınıb.
Qeyd edək ki, Telegram rəhbərinin məhkəməyə vəkilləri David-Olivier Kaminski və Kristof Ingren ilə birgə gəldiyi bildirilmişdi. Həmin vaxt Durov, “Fransa ədalət sisteminə güvəndiyini” açıqlamışdı.
Eyni zamanda, David-Olivier Kaminski müştərisinin Telegram istifadəçiləri tərəfindən törədilən cinayətlərdə "əlaqəsi" olduğu iddiasını "absurd" adlandırmışdı.
