PayPal istifadəçilərin artıq Bitcoin kimi kriptovalyutaları öz hesabları vasitəsilə istifadə etdikləri digər pul kisələrinə və birjalara köçürə biləcəklərini açıqlayıb. Bir sözlə, PayPal istifadəçiləri öz hesabları vasitəsilə blokçeyn, kripto və digər rəqəmsal pul növlərini aktiv şəkildə istifadə edə biləcəklər. Onlar həmçinin PayPal sistemində olan hər kəsə kriptovalyuta göndərə bilərlər
Şirkətin kriptovalyuta sahəsi üzrə baş vitse-prezidenti və baş meneceri Jose Fernandez da Ponte mövzu ilə bağlı açıqlamasında bu xüsusiyyətin platformada kriptovalyutaların alınması başladığı vaxtlardan bəri istifadəçilər tərəfindən ən çox tələb olunan xüsusiyyət olduğunu bildirib. Həmçinin o, istifadəçilərin başqa yerdə kriptovalyutası varsa və onu birləşdirmək istəyirlərsə, onu digər ünvanlardan PayPal-a asanlıqla köçürə biləcəyini əlavə edib.
Qeyd edək ki, bu yeni funksiya sayəsində bütün istifadəçilər artıq kripto pullarını PayPal hesablarına yığa biləcəklər. O, həmçinin investisiya və ödəniş vasitəsi kimi də istifadə edilə bilər. Köçürmələrin saniyələr ərzində tamamlanacağı da bildirilir.
