Qazaxıstan Respublikasının süni intellekt və rəqəmsal inkişaf nazirliyinin məlumatına görə, Qazaxıstan hökuməti OpenAI şirkəti ilə təhsil sistemində süni intellektin tətbiqinə dair əməkdaşlıq memorandumu imzalayıb.
OpenAI və Qazaxıstan rəsmilərinin görüşü Vaşinqtonda baş tutub. İmzalanan sənəd Qazaxıstanın təhsil sisteminə Sİ həllərinin tətbiqi sahəsində uzunmüddətli əməkdaşlığın əsasını qoyur.
Bu razılaşma sayəsində Qazaxıstan pedaqoqları təhsil müəssisələri üçün xüsusi hazırlanmış ChatGPT Edu versiyasına çıxış əldə edəcəklər. Şirkət üç il ərzində hər il müəllimlər üçün ən azı 165 min lisenziya təqdim edəcək.
Bu təşəbbüs Qazaxıstanın "rəqəmsal transformasiya və insan potensialının inkişafı" üzrə milli strategiyasına dəstək məqsədi daşıyır.
