Qazaxıstanın Süni İntellekt və Rəqəmsal İnkişaf Nazirliyi ilə Oracle şirkəti arasında anlaşma memorandumu imzalanıb. Kazinform agentliyinin verdiyi məlumata görə, Vaşinqtonda keçirilən C5+1 Sammiti zamanı əldə edilən bu razılaşma süni intellekt, yüksək məhsuldarlıqlı hesablamalar və bulud texnologiyaları sahəsində əməkdaşlığın gücləndirilməsinə yönəlib.
Süni İntellekt və Rəqəmsal İnkişaf Nazirliyi memorandumun təfərrüatları barədə məlumat verib. Sənədə əsasən, tərəflər Qazaxıstanda pilot süni intellekt infrastrukturu kimi Oracle həllərinin tətbiqinin mümkünlüyünü qiymətləndirmək, müvafiq sınaqlar keçirmək, bulud məlumat mərkəzlərinin mərhələli inkişafını araşdırmaq və tətbiqi süni intellekt sahəsində pilot layihələr həyata keçirmək üçün əməkdaşlıq etməyi planlaşdırır.
Əməkdaşlıq həmçinin Oracle tərəfindən insan kapitalının inkişafı proqramlarına (ixtisaslaşdırılmış təlim və sertifikatlaşdırma daxil olmaqla) məsləhət dəstəyinin göstərilməsini, birgə tədqiqat layihələrini və Qazaxıstanda Oracle Səlahiyyət Mərkəzinin (Competency Center) yaradılmasını da nəzərdə tuta bilər.
Tərəflər, həmçinin süni intellektin inkişafının tənzimləyici və etik aspektləri ilə bağlı müzakirələri davam etdirməyi planlaşdırır.
Oracle ilə əməkdaşlıq Qazaxıstanın milli süni intellekt infrastrukturunun və rəqəmsal ekosisteminin inkişafını dəstəkləyəcək. Bu, bizim texnoloji innovasiyaları təşviq etmək və ölkənin rəqəmsal iqtisadiyyatı üçün güclü bir təməl qurmaq öhdəliyimizi göstərir, – deyə Qazaxıstan Baş nazirinin müavini, Süni İntellekt və Rəqəmsal İnkişaf naziri Jaslan Madiyev bildirib.
Oracleın Hökumət Məsələləri üzrə İdarəedici Direktoru Ellison O’Brayen (Allison O’Brien) qeyd edib ki, şirkət Qazaxıstana milli süni intellekt strategiyasının həyata keçirilməsində dəstək olmağı səbirsizliklə gözləyir və onların texnologiyaları ilə təcrübəsi iqtisadiyyatın müxtəlif sektorlarında rəqəmsal transformasiyanı sürətləndirməyə və innovasiyaları təşviq etməyə kömək edəcək.
Daha əvvəl Prezident Qasım-Jomart Tokayev C5+1 Sammitində iştirak etmək üçün Vaşinqtona rəsmi səfərə gəlmişdi. Səfər çərçivəsində Qazaxıstan və ABŞ kritik əhəmiyyətli minerallar sahəsində əməkdaşlıq haqqında Anlaşma Memorandumu imzalamışdı. Həmçinin, əvvəlcədən bildirildiyi kimi, Qazaxıstan Coursera əsaslı rəqəmsal təlim platformasını işə salmağa hazırlaşır.
