Kriptovalyuta alqı-satqı platforması olan Kuantist, 35 milyon dollar dəyərində qiymətləndirmə ilə uğurlu investisiya raundunu tamamlayıb. İnvestisiyanın dəqiq məbləği açıqlanmasa da, bu mərhələdə Latviya mənşəli alqoritmik ticarət üzrə ixtisaslaşmış Gravity Team LTD, Borsa İstanbul-un sabiq baş direktoru və Türkiyə Mərkəzi Bankı sədrinin keçmiş müavini Murat Çetinkaya, eləcə də Borsa İstanbul-un keçmiş baş direktor müavini Alpogan Sabri Erdoğan kimi nüfuzlu adlar iştirak ediblər.
2021-ci ildə təsis edilən və İstanbula mərkəzlənmiş Kuantist, istifadəçilərə rahat və sürətli kriptovalyuta əməliyyatları təqdim edir. Platforma vasitəsilə istifadəçilər Bitcoin, Tether və digər müxtəlif rəqəmsal aktivlərin alqı-satımını həyata keçirə, eyni zamanda asan pul yatırma və çıxarma əməliyyatları edə bilirlər. 7/24 canlı dəstək xidməti ilə Kuantist istifadəçi təcrübəsinə xüsusi önəm verir.
Şirkətin qurucu baş direktoru Serhat Yıldız investisiya raundundan sonra verdiyi açıqlamada bildirib:
“Bütün fəaliyyətimizin mərkəzində ölkəmizdə kriptovalyuta ekosisteminin sağlam və davamlı inkişafına dəstək durur. Bu istiqamətdə, yüksək ixtisaslı proqramçılar və maliyyə mütəxəssislərindən ibarət komandamızı böyütməyə davam edirik.”
O həmçinin əlavə edib:
“Yeni investisiya ilə birlikdə həm innovativ məhsullar üzərində işləməyə, həm də Türkiyədə kriptovalyuta sektorunun gələcəyini formalaşdırmağa yönəlmiş səylərimizi gücləndirəcəyik. Güclənmiş kapital strukturu və yeni tərəfdaşlarımız, həm bizə olan etimadın, həm də bizim bu sahəyə və ölkəmizə olan inamımızın göstəricisidir.”
Kuantist-in bu uğurlu investisiya mərhələsi, Türkiyədə kriptovalyutaya olan marağın artdığını və yerli platformaların beynəlxalq oyunçularla rəqabət aparmaq gücündə olduğunu bir daha ortaya qoyur
