ABŞ, Yaponiya, Avstraliya, Fransa, Kolumbiya, Qazaxıstan və digər ölkələrin aviaşirkətləri 29–30 sentyabr 2025-ci il üçün nəzərdə tutulan onlarla aviareysi ləğv edib və ya gecikdirdiklərini açıqlayıblar. Bu barədə beynəlxalq KİV məlumat yayıb.
Gecikmələrə Air France, American Airlines, avstraliyalı Jetstar, kolumbiyalı Avianca, yapon All Nippon Airways, həmçinin Qazaxıstanın Air Astana və FlyArystan şirkətləri təsdiq verib. Şirkətlər bildiriblər ki, tədbirlərin səbəbi Airbus-un A320 ailəsinə aid təyyarələrində bort kompüterlərinin təcili yenilənməsidir.
Airbus 28 noyabr 2025-də bəyan edib ki, A320 tipli təyyarələrdə güclü günəş radiasiyası səbəbindən idarəetmə sistemində nasazlıqlar yarana bilər. Bu problem oktyabrda baş verən insidentin araşdırılması zamanı üzə çıxıb. Həmin hadisədə JetBlue Airways-in Kanqundan (Meksika) Nyuarka (ABŞ) uçan təyyarəsi qəfil hündürlük itirib və məcburi eniş edib.
Şirkət dünya üzrə təxminən 6000 təyyarəni proqram təminatının yenilənməsi üçün geri çağırıb. Bloomberg-in məlumatına görə, onların təxminən 1000-də əlavə olaraq avadanlığın dəyişdirilməsi tələb olunacaq. Bəzi aviaşirkətlər uçuş cədvəllərini qorumaq üçün əvvəlki proqram versiyasına qayıdıblar.
Rusiyanın Rosaviatsiya qurumu isə ilkin qiymətləndirmədən sonra bildirib ki, A320-lərdə aşkarlanan bu texniki problem yerli daşıyıcılara təsir etməyəcək. Səbəb kimi göstərilib ki, 2022-ci ildən bəri Rusiyada aviaşirkətlərin təyyarə proqramları yenilənmir.
