ABŞ Hərbi Hava Qüvvələrinin Tədqiqat Laboratoriyası (AFRL) Blue Origin ilə imzaladığı müqavilənin maliyyəsini əlavə 11,7 milyon dollar artırıb. Bununla da layihənin ümumi dəyəri təxminən 13 milyon dollara çatıb.
Layihənin məqsədi kommersiya raketlərindən istifadə etməklə hərbi yüklərin dünyanın istənilən nöqtəsinə 1 saatdan az müddətdə çatdırılmasının mümkünlüyünü araşdırmaqdır.
Blue Origin raketlə Yer üzərində iki nöqtə arasında yük daşınması (point-to-point) konsepsiyası üçün texniki tələbləri və missiya parametrlərini hazırlayacaq. Bu yanaşma saatlar və ya günlər çəkən hava və dəniz daşımalarını bir saatdan qısa müddətə endirməyi hədəfləyir.
Layihə 2027-ci ilin oktyabrına qədər davam edəcək. Hazırkı mərhələdə yalnız texnologiyanın araşdırılması və konsepsiyanın işlənməsi nəzərdə tutulur. Demo uçuşu və ya hazır sistemin yaradılması isə planlaşdırılmır.
Təşəbbüs AFRL-in Rocket Experimentation for Global Agile Logistics (REGAL) proqramı çərçivəsində həyata keçirilir. Proqram üzrə Anduril Industries, Sierra Space və Rocket Lab da maliyyə dəstəyi alıb.
Potensial daşıyıcı platforma kimi Blue Origin şirkətinin ağır sinif, təkrar istifadə edilə bilən New Glenn raketi nəzərdən keçirilir. Raket 2025-ci ilin yanvarında ilk orbital uçuşunu həyata keçirib və indiyədək üç orbital missiyanı tamamlayıb. Lakin 2026-cı ilin mayında sınaqlar zamanı baş verən insidentdən sonra uçuşlar dayandırılıb. Şirkət New Glenn raketini ilin sonuna qədər yenidən istismara qaytarmağı planlaşdırır.
