ABŞ-ın süni intellekt şirkəti Anthropic yeni investisiya raundu üzrə investorlardan təkliflər alıb. Mənbələrin Business Insider və Bloomberg-ə verdiyi məlumata görə, bu raundda şirkətin dəyəri 800 milyard dollar səviyyəsində qiymətləndirilə bilər. Bu isə 2026-cı ilin fevralında qeydə alınan 380 milyard dollarlıq qiymətləndirmədən iki dəfə çoxdur.
Qeyd edək ki, şirkət 2026-cı ilin fevralında 30 milyard dollar, 2025-ci ilin sentyabrında isə 13 milyard dollar investisiya cəlb etmişdi. Bununla belə, Anthropic yaxın aylarda maliyyə cəlbini istisna etməsə də, bu şərtlərlə razılaşıb-razılaşmayacağı hələ dəqiq deyil. Şirkət məsələ ilə bağlı rəsmi şərh verməkdən imtina edib.
Analitiklər investor marağının artmasını yeni məhsullar və hadisələrlə əlaqələndirir. Xüsusilə, Claude Mythos modelinin təqdimatı diqqət çəkib. Şirkət bu modelin “minlərlə” sıfır gün zəifliyini aşkar etdiyini bildirib.
Bundan əlavə, Anthropic-in gəlirlərində ciddi artım müşahidə olunur. 2026-cı ilin aprelində şirkət illik proqnoz gəlirinin 2025-ci ilin sonundakı 9 milyard dollardan 30 milyard dollara yüksəldiyini açıqlayıb. Bu artım əsasən iri korporativ müştərilər hesabına baş verib.
Məlumata görə, Anthropic 2026-cı ilin sonuna qədər birjaya çıxmağı və 60 milyard dollardan çox vəsait cəlb etməyi planlaşdırır. Rəqib OpenAI-nin son qiymətləndirilməsi isə 852 milyard dollar təşkil edir, lakin bəzi investorlar şirkətin strategiyası ilə bağlı suallar qaldırır.
