FARI Solutions 10-11 sentyabr 2024-cü il tarixlərində Bakıda keçiriləcək Chain Reaction 2024 konfransının dünyanın ən böyük kriptovalyuta birjası olan Binance və aparıcı blokçeyn ekosisteminin tam dəstəyi ilə təşkil olunacağını elan edib. Tədbir, Web 3.0, süni intellekt, blokçeyn, fintech və kriptovalyutalar kimi aktual mövzuların müzakirəsi üçün müxtəlif sahələrdən olan liderləri bir araya gətirməyi hədəfləyir.
Konfransda Binance-in Qlobal Baş Marketinq Direktoru Reyçel Konlan və Qlobal Regional Bazarlar üzrə rəhbəri Vişal Saçindran, həmçinin Azərbaycanın İnnovasiya və Rəqəmsal İnkişaf Agentliyinin sədri İnara Vəliyeva, 4-cü Sənaye İnqilabı Mərkəzinin (C4IR) İcraçı direktoru Fariz Cəfərov, Lixtenşteyn Maliyyə Bazarının İnnovasiya və Rəqəmsallaşma İdarəsinin müdir müavini Dr. Anjelika Layr kimi tanınmış simalar çıxış edəcəklər. Tədbirdə, həmçinin Barings, Vodafone, Syz Group, Beincrypto, Jadwa Investment, Dow Jones, EY, Deloitte kimi dünya miqyaslı şirkətlərin nümayəndələri də iştirak edəcək.
Formula 1 Azərbaycan Qran Prisi ilə eyni vaxta təsadüf edən Chain Reaction 2024 konfransı, tədbirə böyük diqqət və iştirakçıların fəallığını təmin edəcək. Partnyorlar üçün brendlərini geniş auditoriyaya tanıtmaq üçün unikal imkanlar yaradılacaq, iştirakçılar isə sənaye liderləri ilə birbaşa ünsiyyət qurmaq və təcrübəyə əsaslanan seminarlar vasitəsilə biliklərini genişləndirmək imkanı əldə edəcəklər.
Təşkilatçılar texnologiya həvəskarlarını, kripto yenilikçilərini və sənayəyə yeni qoşulanları bu əhəmiyyətli tədbirdə iştirak etməyə dəvət edir. Rəqəmsal iqtisadiyyatın gələcəyini formalaşdıran yenilikləri öyrənmək, vizionerlərlə ünsiyyət qurmaq və kriptovalyutalar, Web3 inkişafı və tokenləşdirilmiş aktivlər kimi anlayışlarla tanış olmaq üçün nadir bir fürsətdir. Tədbirdə həmçinin Bitcoin-in iş sübutu (proof-of-work) kimi konsensus protokollarının davamlılığı və inkişaf perspektivləri ilə bağlı mühüm müzakirələr aparılacaq.
